सोलापूर शहरात भीषण घटनेत एका महिलेचा आगीत होरपळून मृत्यू झाल्याची धक्कादायक घटना उघडकीस आली आहे. जुन्या विडी घरकुल परिसरातील गाडगी नगर येथे शनिवारी पहाटे ही घटना घडली. पल्लवी प्रवीण सग्गम (वय 40) असे मृत महिलेचे नाव असून, घरातील एसीचा स्फोट होऊन शॉर्टसर्किट झाल्यामुळे ही आग लागल्याची प्राथमिक माहिती समोर आली आहे.

मिळालेल्या माहितीनुसार सलग तीन दिवस आलेल्या सुट्ट्यांमुळे पल्लवी सग्गम घरीच होत्या. अचानक मोठा आवाज झाला आणि काही क्षणांतच संपूर्ण घर धुराने व ज्वाळांनी वेढले गेले. स्थानिकांनी तात्काळ ओरडून शेजाऱ्यांना बोलावले. नागरिकांनी अग्निशामक दलाला माहिती दिल्यानंतर ते घटनास्थळी दाखल झाले. मात्र आग एवढ्या झपाट्याने पसरली की महिलेचे प्राण वाचवणे शक्य झाले नाही. पल्लवी यांचा जागीच दुर्दैवी मृत्यू झाला.

शॉर्टसर्किटमुळे आग लागल्याची प्राथमिक माहिती असली तरी एसीचा स्फोट हा नेमका कशामुळे झाला, त्यात काही तांत्रिक बिघाड होता का किंवा वायरिंगमध्ये काही दोष होता का, याची तपासणी सुरू आहे. पोलीसांनी पंचनामा केला असून विजतज्ञांना देखील तपासासाठी पाचारण करण्यात आले आहे.

या घटनेनंतर परिसरात मोठी खळबळ उडाली. पहाटे अचानक घडलेल्या या घटनेने स्थानिक नागरिक भयभीत झाले. आगीमुळे घरातील फर्निचर, कपडे, घरगुती वस्तू यांचेही मोठे नुकसान झाले आहे. घटनेची माहिती मिळताच विज वितरण कंपनीचे कर्मचारीही घटनास्थळी दाखल झाले व वीज पुरवठा बंद करून परिस्थिती नियंत्रणात आणली. पल्लवी सग्गम यांचा अकस्मात झालेल्या मृत्यूमुळे गाडगी नगर परिसर शोकमग्न झाला आहे. शेजारी व नातेवाईक घटनास्थळी दाखल झाले असून कुटुंबीयांवर दुःखाचा डोंगर कोसळला आहे. या प्रकरणाचा पुढील तपास पोलीस करत आहेत.