मंत्रालयात मंत्रिमंडळ बैठकीची लगबग सुरु होती. मात्र बैठकीपुर्वीच मंत्रिमंडळाचा अजेंडा फुटला आणि राज्यात डान्स बार सुरु करण्याबाबतचा निर्णय घेण्यात येणार असल्याची बातमी माध्यमांमध्ये झळकली. त्यामुळे फडणवीसांच्या रागाचा पाराच चढला. त्यानंतर फडणवीसांनी आपल्याच मंत्रिमंडळातील फितूर मंत्र्यांना सज्जड दम दिलाय.

तर ठाकरे मुख्यमंत्री असतानाही मंत्रिमंडळ बैठकीचा अजेंडा लीक केला जात होता. तुम्ही ज्यांना सन्मानाची पदं दिले तेच लोकं फितुरी करत असल्याचा दावा राऊतांनी केलाय. तर मुख्यमंत्र्यांना मंत्रिमंडळातील फितूर शोधण्यासाठी आवश्यकता असेल तर विरोधक म्हणून आम्ही नावं देऊ, असं विधान वडेट्टीवारांनी केलंय.

एकीकडे शिंदे-फडणवीसांमध्ये कुरघोडीचं राजकारण रंगल्याची चर्चा आहे. त्यातच आता कॅबिनेट मीटिंगपुर्वीच अजेंडा लीक होत असल्याने फडणवीसांनी आपल्या मंत्री आणि अधिकाऱ्यांना कारवाईचा इशारा दिलाय. त्यामुळे मंत्री गोपनियतेची शपथ पाळून मंत्रिमंडळाचा अजेंडा गुप्त ठेवणार की कुरघोडीच्या राजकारणात जाणीवपूर्वक बातम्या बाहेर येत राहणार हे पाहणं महत्वाचं ठरेल.