सांगली, ता.४ ऑगस्ट २०२४

'भारतीय जनता पक्ष घाणेरडे राजकारण करत असून संसदेत बोलू दिले जात नाही, आवाज दाबण्याचा प्रयत्न होतोय,' असे म्हणत काँग्रेसचे खासदार विशाल पाटील यांनी एनडीए सरकारवर जोरदार हल्लाबोल केला. जत तालुक्यातील निगडी येथे आयोजित बंजारा समाज व भटक्या विमुक्त जाती-जमातीच्या मेळाव्यात ते बोलत होते.

जत तालुक्यातील निगडी (बुद्रुक) येथे बंजारा समाज व भटक्या विमुक्त जाती-जमातीच्या मेळाव्याचे आयोजन करण्यात आले होते. या कार्यक्रमाला खासदार विशाल पाटील, आमदार विश्वजित कदम तसेच आमदार राजेश राठोड उपस्थित होते. यावेळी बोलताना विशाल पाटील यांनी केंद्र सरकारवर जोरदार टीका केली.

काय म्हणाले विशाल पाटील?

"भाजपच्या लोकांचं राजकारण खूप घाणेरडं असतं. आम्हाला संसदेत तुमचे मुद्दे मांडत असताना ओरडल्याशिवाय मुद्दाच मांडू देत नाहीत. तुमच्या लक्षात आलं असेल माझा आवाजही बसलेला आहे. पण तुमचे प्रश्न मांडण्यासाठी तुमची कामे करण्यासाठी रोज मिठाच्या गुळण्या करुन आवाज वाचवू, पण तुमचा आवाज बनून दिल्लीला जाऊ," असं विशाल पाटील यावेळी म्हणाले.

तसेच लोकसभेच्या निकालाची आकडेवारी जर बघितली तर २ तृतीयांश मतांनी महाराष्ट्रात काँग्रेस विचाराचेच सरकार येणार आहे. माझे हात बळकट केले पाहिजेत, विश्वजित कदम यांचे हात बळकट केले पाहिजेत, यासाठी या जत तालुक्यातून पुन्हा एकदा विक्रम दादांनाच निवडून दिलं पाहिजे, असे आवाहनही त्यांनी यावेळी केले.