इंडिया आघाडीच्या मोर्चादरम्यान ठाकरे गटाला मोठा धक्का बसलाय. ठाकरे गटाच्या प्रवक्त्यानं तडकाफडकी राजीनामा दिलाय. ठाकरे गटाचा हिंदी चेहरा असलेले आनंद दुबे यांनी पक्षाचा राजीनामा दिलाय. पक्षाच्या कार्यभारावर आनंद दुबे नाराज होते, त्याचमुळे त्यांनी तडकाफडकी राजीनामा दिलाय. दुबे यांच्या राजीनाम्यामुळे राज्यातील महाविकास आघाडीसाठी हा मोठा झटका बसल्याचं म्हटलं जातंय. महाविकास आघाडीमध्ये एकजुटीची चर्चा सुरू असतानाच दुबे यांचा राजीनाम्याने राजकीय वर्तुळात खळबळ माजलीय.

राजीनामा देण्यामागील कारण काय?

आपल्या राजीनामा दिल्यानंतर आनंद दुबे म्हणाले की, राष्ट्रीय मुद्द्यांवर मतभेद असू शकतात परंतु राष्ट्रहित हेच सर्वोपरी असले पाहिजे. २२ एप्रिल रोजी पहलगाम येथे झालेल्या दहशतवादी हल्ल्याचा संदर्भ देताना त्यांनी सांगितले की, २६ एप्रिल रोजी त्यांनी पक्षाचे सहकारी आणि विधिमंडळ शाखेचे उप-संघटक गुलाबचंद मौर्य यांच्यासमवेत घटनास्थळाला भेट दिली होती. त्यावेळी त्या भागात गोळीबारामुळे तणावपूर्ण परिस्थिती असल्याचं त्यांनी नमूद केले. या भेटीदरम्यान त्यांनी फारुख अब्दुल्ला आणि नायब राज्यपाल मनोज सिन्हा यांची भेट घेऊन त्यांना आपल्या पक्षाचा पाठिंबा असल्याचे आश्वासन दिलं होतं.

देश आधी मग...

अशा संकटकाळात ज्येष्ठ खासदार आणि आमदारांनी घटनास्थळी भेट द्यायला हवी होती. जरी ते एखादे मोठे नेते किंवा नगरसेवक नसले, तरीही ते बाळासाहेब ठाकरे यांच्या विचारांनी प्रेरित आहेत. त्यांच्यात शिवसैनिकांची भावना आहे. देशासमोरील संकट हीच मुख्य बाब आहे. पक्ष आणि स्वतःचा विचार नंतर, पण देश आधी, असं आनंद दुबे यांनी ठामपणे सांगितलं.