राष्ट्रवादी काँग्रेस पक्षाच्या राष्ट्रीय कार्यकारिणीच्या बैठकीत नवीन राष्ट्रीय अध्यक्ष म्हणून उपमुख्यमंत्री सुनेत्रा पवार यांची औपचारिक घोषणा करण्यात आली. ही बैठक वरळी येथील NSCI डोम येथे बोलावण्यात आली होती. माजी अध्यक्ष अजित पवार यांच्या निधनानंतर राष्ट्रीय अध्यक्षपद रिक्त झाले होते. त्यानंतर सुनेत्रा पवार यांना राष्ट्रीय अध्यक्षा करण्यात यावे अशी मागणी करण्यात आली होती. राष्ट्रीय अध्यक्षपदासाठी अजित पवार यांचे पुत्र पार्थ पवार यांचे नावही चर्चेत होते, परंतु राज्य आणि केंद्रीय कार्यकारिणीने सुनेत्रा पवार यांच्या नावावर एकमताने सहमती दर्शवली.

प्रफुल्ल पटेल यांनी पक्षाच्या राष्ट्रीय कार्यकारिणीत सुनेत्रा पवार यांना राष्ट्रीय अध्यक्ष केलं जावं, असा प्रस्ताव मांडला. त्यावर सर्व आमदार आणि मंत्र्यांनी हात उंचावत सहमती दर्शवली. त्यानंतर राष्ट्रीय अध्यक्ष म्हणून सुनेत्रा अजित पवार यांची निवड करण्यात आली. दरम्यान, पार्थ पवार यांच्याकडेही मोठी जबाबदारी देण्यात येणार असल्याची माहिती आहे.पक्षाच्या राष्ट्रीय कार्यकारणीच्या बैठकीला सुनेत्रा पवार, सुनील तटकरे, प्रफुल पटेल, पार्थ पवार, रुपाली चाकणकर छगन भुजबळ यांच्यासह अनेक नेते उपस्थित होते.

अजितदादा २८ जानेवारी दिवशी आपल्यातून निघून गेले, आपल्या सर्वांसाठी ते धक्कादायक होतं. आपल्या सर्वाना प्रश्न होता उद्या आपण काय करणार, कसं करणार? पण सुनेत्राताईंच्या नेतृत्वात आपला पक्ष काम करेल, असे म्हणत प्रफुल्ल पटेल यांनी अध्यक्षपदाचा प्रस्ताव मांडला. पक्षाच्या राष्ट्रीय कार्यकारिणीच्या बैठकीत बोलताना पक्षाचे कार्यकारी अध्यक्ष प्रफुल पटेल यांनी अजितदादांच्या आठवणींना उजाळा दिला. अजित पवारांनी मला राष्ट्रीय कार्याध्यक्ष केलं होतं. त्यांनी माझ्यावर एवढा मोठा विश्वास टाकला. पक्ष महाराष्ट्र आणि देशाच्या हितासाठी आम्ही काम केलं. राष्ट्रीय कार्याध्यक्ष म्हणून माझी आणि प्रदेश अध्यक्ष म्हणून तटकरे आणि भुजबळ मुश्रीफ आमची सर्वांची जबाबदारी होती.