गिरीश कांबळे, मुंबई|ता. ११ जानेवारी २०२४

Sandeep Deshpande News:

आशियातील सर्वात श्रीमंत उद्योगपती आणि भारतातील आघाडीचे प्रसिद्ध उद्योगपती मुकेश अंबानी यांचं एक वक्तव्य सध्या चांगलेच चर्चेत आले आहे. मुकेश अंबानी यांनी गुजरातला आपली मातृभूमी आणि कर्मभूमी असल्याचे सांगितले आहे. तसेच रिलायन्स ही गुजराती कंपनी होती आणि भविष्यातही गुजराती कंपनी राहील, असेही मुकेश अंबानी (Mukesh Ambani) म्हणालेत. अंबानींच्या या विधानावरुन महाराष्ट्र नवनिर्माण सेनेने संताप व्यक्त करत जोरदार प्रत्यूत्तर दिले आहे. मनसे नेते संदीप देशपांडे यांनी पत्रकार परिषद घेत अंबानींच्या या वक्तव्याचा समाचार घेतला आहे.

काय म्हणालेत संदिप देशपांडे?

"रिलायन्स ही एक भारतीय कंपनी आहे असं आम्हाला वाटतं होतं. पण अंबानी यांनी कालच स्पष्ट सांगून टाकलं की रिलायन्स एक गुजराती कंपनी आहे. तुम्ही महाराष्ट्रात आलाच कशाला? जमिनी पण महाराष्ट्रातल्या वापरल्या. मराठी माणसाने जमिनी दिल्या, त्याचाच उपयोग करत उद्योग करता आहात ना?" असा सवाल संदीप देशपांडे (Sandeep Deshpande) यांनी उपस्थित केला आहे.

बोऱ्याबिस्तरा गुंडाळा, गुजरातला जा..

तसेच "फक्त गुजरातीचं असाल तर महाराष्ट्रात तुमचं काम काय? जर तुमची कंपनीच गुजराती असेल तर बोऱ्याबिस्तरा गुंडाळा, तुमचा एंटिलियाचा गाशा गुंडाळा आणि गुजरातला जा.." असा इशाराही संदीप देशपांडे यांच्याकडून देण्यात आला आहे. यापुढे मराठी माणसाने हे लक्षात ठेवायला पाहिजे की आपण एका गुजरात कंपनीकडून वस्तू घेत आहोत," असेही ते म्हणालेत.

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पंतप्रधानांवरही निशाणा...

"पंतप्रधान (Narendra Modi) त्यांच्या बाजूला उपस्थित होते तेव्हा त्यांनी हे विधान केलं. पंतप्रधान यांनी त्यांना सांगायला पाहिजे होतं तुमची कंपनी भारतीय आहे, की पंतप्रधान पण फक्त गुजरातचेच आहेत. प्रश्न असा आहे ह्याच गोष्टी आम्ही जेव्हा बोलतो तेव्हा अख्खा देश आम्हाला संकुचित बोलतो. आता ते संकुचित नाही का?" असेही संदीप देशपांडे म्हणाले. (Latest Marathi News)