सोलापूरच्या मारकडवाडीमध्ये बॅलेट पेपर मतदानावरून आता भाजपच्या आजी-माजी आमदारांमध्ये चांगली जुंपली आहे. या घटनेच्या मागे रणजितसिंह मोहिते पाटील यांचा हात असल्याचा आरोप भाजपच्या माजी आमदाराने केला आहे. मारकडवाडी येथे बॅलेट पेपरवर फेर चाचणी मतदान घेण्याच्या मागणी मागे भाजप आमदार रणजितसिंह मोहिते पाटील यांचा हात आहे, असा गंभीर आरोप भाजपचे माळशिरसचे माजी आमदार राम सातपुते यांनी केला आहे.

मारकडवाडी येथे आज बॅलेट पेपरवर फेर चाचणी मतदान घेण्यात येणार होते. परंतु प्रशासनाच्या विरोधा नंतर फेर मतदान प्रक्रिया रद्द करण्यात आली. त्यानंतर माजी आमदार राम सातपुते यांच्याशी संवाद साधला असता त्यांनी आमदार उत्तम जानकर आणि रणजितसिंह मोहिते पाटील यांच्यावर थेट निशाणा साधला. या बॅलेट पेपर मतदानामध्ये रणजितसिंह मोहिते पाटील यांचा हात असल्याचा गंभीर आरोप राम सातपुते यांनी केला आहे.

आमदार उत्तम जानकर यांनी मारकडवाडीची काळजी करू नये. त्यांनी कोणत्याही निवडणूकीची तयारी करावी. आमदार उत्तम जानकर यांचा जातीचा दाखला लवकरच न्यायालयात रद्द होणार आहे. त्यामुळे लवकरच माळशिरसमध्ये पोटनिवडणूक लागेल.' असा मोठा दावा राम सातपुते यांनी केला आहे.

दरम्यान, मारकडवाडी गावामध्ये आतापर्यंत शरद पवार गटाचे नेते उत्तम जानकर यांना मताधिक्य मिळत होते. पण या निवडणुकीमध्ये भाजपचे उमेदवार राम सातपुते यांना मताधिक्य मिळाले. त्यामुळे उत्तम जानकर यांनी स्वखर्चाने गावात बॅलेटपेपरवर मतदान घेण्याचा निर्णय घेतला. गावामध्ये मतदानासाठी ५ बूथ तयार करण्यात आले होते. सकाळपासून या मतदान प्रक्रियेला सुरूवात होणार होती पण मतदान प्रक्रियेला पोलिसांनी परवानगी दिली नाही. प्रशासनाच्या दबावामुळे मतदान प्रक्रिया रद्द करण्यात आली, असे उत्तम जानकर यांनी सांगितले.