Summary -

• कोकणामध्ये बाप-लेक आमनेसामने आले आहेत

• गुहागर नगरपंचायतीच्या निवडणुकीत बाप-लेक निवडणुकीच्या रिंगणात उतरले

• राजेंद्र अर्जुन भागडे (शिवसेना शिंदे गट) विरुद्ध त्यांचा मुलगा सौरभ राजेंद्र भागडे (राष्ट्रवादी अजित पवार गट) अशी लढत होणार

• कोकणातील स्थानिक स्वराज्य निवडणुकांमध्ये बाप-लेकांची चर्चा होत आहे

राज्यात आगामी स्थानिक स्वराज्य संस्थांच्या निवडणुकीची रणधुमाळी सुरू आहे. सर्वच राजकीय पक्ष प्रचारासाठी मैदानात उतरले आहेत. अशातच कोकणातील राजकारणातून मोठी बातमी समोर आली आहे. नगरपंचायतीच्या निवडणुकीमध्ये बाप-लेक आमने सामने आले आहेत. दोघांनी देखील उमेदवारी अर्ज दाखल केला. गुहागर नगरपंचायंतीची निवडणूक हे दोघेजण लढणार आहेत. त्यामुळे यांच्यापैकी कोण बाजी मारतंय हे पाहणं महत्वाचे ठरणार आहे.

गुहागर नगरपंचायतीच्या निवडणुकीत वडील आणि मुलामध्ये लढत होणार आहे. गुहागर नगरपंचायतीच्या वार्ड क्रमांक -१३ मध्ये शिवसेना शिंदे गटाकडून वडील राजेंद्र अर्जुन भागडे हे नगरसेवक पदाची निवडणूक लढवत असून त्यांच्यात विरोधात राष्ट्रवादी काँग्रेस अजित पवार गटाकडून त्यांचे चिरंजीव सौरभ राजेंद्र भागडे हे निवडणूक लढवत आहेत. त्यामुळे या निवडणुकीकडे संपूर्ण गुहागरवासीयांचे लक्ष लागलं आहे. वडील विरुद्ध मुलगा ही लढत गुहागरमध्ये आकर्षण ठरणार आहे.

रत्नागिरी नगर परिषदेमध्ये महायुतीच्या प्रचाराचा नारळ फुटलाय प्रभाग 5 मधून प्रचाराला सुरुवात झालीय. या प्रभागातून महायुतीकडून सौरभ मलुष्टे आणि पूजा पवार यांना उमेदवारी निच्छित झालीय. तर नगराध्यक्ष पदासाठी शिल्पा सुर्वे निवडणूकीच्या रिंगणात आहेत. रत्नागिरीतील कचरा, पर्यटन, स्मार्ट सिटी, रस्ते, पाणी प्रश्न, मोकाट जनावरे असे विविध प्रश्न या निवडणूकीत चर्चेत असणार आहेत.

दरम्यान, रत्नागिरी जिल्ह्यातील रत्नागिरी, चिपळूण, खेड आणि राजापूर या ४ नगर परिषद तर गुहागर, देवरूख आणि लांजा अशा ३ नगर पंचायतींच्या सार्वत्रिक निवडणुकीतील नगराध्यक्ष पदासाठी ५६ तर या नगर परिषद आणि नगर पंचायतींच्या एकूण १०१ प्रभागांतील १५१ सदस्य पदासाठीच्या निवडणुकीकरीता ६३५ इतके उमेदवारी अर्ज दाखल झाले आहेत. या निवडणूकीसाठी २०० मतदान केंद्र असणार असून एकूण १ लाख ६० हजार ४४८ इतके मतदार आहेत. यामध्ये ८२ हजार ५६२ महिला तर ७७ हजार ८८५ पुरूष मतदारांचा समावेश आहे. नामनिर्देशन पत्रांची छाननी सुरू आहे. अर्ज माघारी घेण्याची मुदत २१ नोव्हेंबरपर्यंत असून निवडणूक चिन्हांचे वाटप २६ नोव्हेंबर रोजी होणार आहे.