राज्यात स्थानिक स्वराज्य संस्थांच्या निवडणुकांमध्ये शिवसेनेला घवघवीत यश मिळाले. जिल्हा परिषदेसह अनेक महानगरपालिकेत शिवसेनेनं सत्ता मिळवली. आता आगामी काळात विधान परिषदेच्या निवडणुका होणार आहेत, त्याआधी पक्षात मोठे बदल केले जाणार आहेत. शिवसेनेत मोठी उलथापालथ केली जाणार असून एकनाथ शिंदेंनी आजी-माजी आमदार, खासदारांसह प्रमुख पदाधिकाऱ्यांना नव्या जबाबदाऱ्या देण्यात येणार आहेत.

शिवसेनेकडून लोकसभा संपर्क प्रमुख आणि विभागीय संपर्क प्रमुख व सह संपर्क प्रमुखांच्या नियुक्त्या जाहीर करण्यात आल्या आहेत. तर अत्यंत महत्वाच्या असलेल्या मुंबई व ठाण्याची लोकसभेची जबाबदारी खासदार श्रीकांत शिंदे यांच्याकडे देण्यात आली आहे. मुंबईत त्यांच्यासोबत मंत्री योगेश कदम, माजी खासदार राहुल शेवाळे व आमदार निलेश राणे हेही जबाबदारी संभाळणार आहेत.

दुसरीकडे मंत्री उदय सामंत यांच्याकडे पुण्यासह मावळ आणि कोल्हापूरचे लोकसभा संपर्कप्रमुखाची जबाबदारी असणार आहे. खासदार नरेश म्हस्के यांना भिवंडी आणि कल्याणचे संपर्कप्रमुख करण्यात आले आहे. राज्यसभा खासदार ज्योती वाघमारे यांच्याकडे शिर्डी मतदारसंघाची जबाबदारी आहे. तेथे शिवसेनाची मोर्चबांधणी, पक्षाला बळकटी देण्याचं काम त्यांच्याकडे असणार आहे. राजन साळवी यांच्यावरही अकोल्याची जबाबदारी देण्यात आली आहे.

विभागीय संपर्कप्रमुखांच्या नियुक्त्या

दक्षिण कोकण विभागातील रत्नागिरी आणि सिंधुदुर्ग जिल्ह्याचे संपर्क प्रमुख किरण सामंत असणार आहेत. मंत्री भरत गोगावले यांच्याकडे उत्तर कोकण विभागातील रायगड आणि पालघर जिल्ह्याची जबाबदारी असणार आहे. माजी आमदार दगडू सपकाळ यांच्याकडे पुणे, सातारा, सांगली, सोलापूर आणि कोल्हापूरची जबाबदारी असणार आहे.