Suresh Dhas Pankaja Munde : संतोष देशमुख हत्या प्रकरणाचा सातत्यानं पाठपुरावा करणाऱ्या आणि आकाचा आका म्हणत धनंजय मुंडेंचा राजीनामा मागणाऱ्या सुरेश धसांच्या निशाण्यावर आता पंकजा मुंडे असल्याच दिसतंय. गेल्या अनेक दिवसांपासून पकंजा मुंडे आणि सुरेश धस यांच्यात शीत वाकयुद्ध रंगलंय. आणि धनंजय मुंडेंच्या राजीनाम्यानंतर सुरेश धसांनी केलेल्या उपरोधिक टिकेमुळे सुरेश धसाचं नेक्स्ट टार्गेट पकंजा मुंडें आहेत की काय अशी शंका येतेय. त्याला कारण ठरलंय ते पकंजा मुंडेंचं एक वक्तव्य.

सरपंच संतोष देशमुखांची निर्घृण हत्या केल्यानंतर राज्याचं राजकारण तापलं. मात्र आपल्याच जिल्ह्यातील घटना असूनही राज्याच्या मंत्री आणि धनंजय मुंडेंच्या भगिनी पंकजा मुंडेंनी या घटनेपासून कायमच अंतर राखण्याचा प्रयत्न केला. मी पर्यावरणमंत्री आणि मला पर्यावरणासंदर्भात विचारा असं देखील पकंजा मुंडेंनी पत्रकारांना सुनावलं होतं .आजही त्यांनी धनंजय मुंडेंच्या राजीनाम्यावर बोलण्याचं टाळलं आणि मग भाजपचे आमदार सुरेश धस यांनी त्यांची चांगलीच खरडपट्टी काढलीये. सुरेश धसांनी पकंजा मुंडेंना सुनावल्यानंतर पकंजा मुंडेंनी लगेचच प्रतिक्रीया देत हा राजीनामा घेणाऱ्यांने ही आधीच घ्यायला हवा होता असं म्हणत मुख्यमंत्र्यांना टोला हाणलाय.

बीडच्या पालकमंत्री पदापासून डावल्यानंतर पकंजा मुंडेंनी नाराजी व्यक्त केली होती पण बीड मधल्या गुंडाराज बाबत आणि सरपंच हत्या प्रकरणाबाबत बोलण्यास त्यांनी कायम आढेवेढे घेतल्याचं दिसलंय. याउलट बीडची बदनामी होत असल्याचा उपदेशाचा डोसही त्यांनी दिला होता. त्यामुळेच सुरेश धस यांनी वेळ मिळेल तिथे पकंजांना टोले मारण्याची एकही संधी सोडली नसल्याचंही दिसलं. त्यांमुळे गोपीनाथ मुंडेंच्या पठडीत शिकलेल्या सुरेश धसांनी मुंडेंच्या पुढच्या पिढीला राजकारणातील धडे शिकवल्याची चर्चा रंगली आहे.