'मराठा समाजाची मतं बोटाच्या कांड्यावर मोजण्या इतकी.', असे वादग्रस्त वक्तव्य माजी मंत्री आणि परतुरचे भाजप उमेदवार बबनराव लोणीकर यांनी केले आहे. जालन्यातील परतुर तालुक्यातील आष्टी येथे एका प्रचार सभेदरम्यान बबनराव लोणीकर यांनी हे वक्तव्य केले होते. बबनराव लोणीकर यांच्या या वक्तव्यामुळे राजकीय वर्तुळात चर्चा रंगली आहे. मराठा समाजाविषयी केलेल्या वादग्रस्त वक्तव्यामुळे बबनराव लोणीकर वादात सापडण्याची शक्यता आहे.

दरम्यान मराठा समाजाबाबत वादग्रस्त वक्तव्य केल्यानंतर बबनराव लोणीकरांनी त्यासंदर्भात खुलासा केला आणि सारवासारव केलीय. काँग्रेसमधून हकालपट्टी झालेल्या लोकांनी मोडतोड करून माझा व्हिडिओ व्हायरल केला आहे असा आरोप बबनराव लोणीकर यांनी नाव न घेता अपक्ष उमेदवार सुरेशकुमार जेथलिया यांच्यावर केला आहे. सध्या बबनराव लोणीकर यांचा हा व्हिडीओ सोशल मीडियावर तुफान व्हायरल होत असून मराठा समाजाकडून नाराजी व्यक्त केली जात आहे.