Maharashtra Political News: राष्ट्रवादीचे नेते अजित पवार (Ajit Pawar) यांच्यासह त्यांच्या समर्थक आमदार शिंदे सरकारमध्ये सामील झाल्याने राजकीय घडामोडींना वेग आला आहे. अजित पवार यांच्याकडून आमच्यासोबतच संपूर्ण राष्ट्रवादी पक्ष असल्याचा दावा केला आहे. तर शरद पवार यांनी पुन्हा पक्षाची मोर्चेबांधणी करण्याची घोषणा केली आहे.

आम्ही पक्षासोबत आहोत आणि पक्षाच्या चिन्हावरच इथून पुढच्या निवडणुका लढवू, अशी भूमिका अजित पवारांनी घेतली होती. त्यानंतर आता अजित पवार त्यांच्या गटाच्या नवीन प्रदेशाध्यक्षांचे नाव घोषीत करणार असल्याचे समोर आले आहे. (Latest Marathi News)

याबाबत अधिक माहिती अशी की, आज सकाळी अजित पवार (Ajit Pawar) यांच्या देवगिरी निवासस्थानी राष्ट्रवादीच्या नेत्यांची बैठक झाली. यामध्ये सुनिल तटकरे (Sunil Tatkare) हे अजित पवार गटाचे प्रदेशाध्यक्ष होणार असल्याची माहिती समोर येत आहे. अजित पवार हे अधिकृत पत्र काढून त्याबाबत घोषणा करतील, असं सांगण्यात आले आहे.

तर दुसरीकडे राष्ट्रवादीचे प्रदेशाध्यक्ष जयंत पाटील (Jayant Patil) यांनी ९ आमदारांवर अपात्रतेची याचिका विधानसभा अध्यक्ष राहुल नार्वेकर यांच्याकडे दाखल केली आहे. तसेच या बंडानंतर पक्षातील राष्ट्रवादी कार्यकर्ते आणि पदाधिकारी प्रतिज्ञापत्र भरून घेण्यात येणार आहेत. या प्रतिज्ञापत्राचा फॉरमॅट देखील पक्षाकडून जागीर करण्यात आला आहे. 

अमोल कोल्हे शरद पवारांसोबत..

दरम्यान, या संपूर्ण नाट्यमय घडामोडी घडत असताना अजित पवार यांना पहिला धक्का मिळाला आहे. काल अजित पवार यांच्या शपथविधी सोहळ्याला उपस्थित असलेले खासदार अमोल कोल्हे (Amol Kolhe) यांनी बाप विसरायचा नाही म्हणत... मी साहेबांसोबत असल्याचे जाहीर केले आहे. ट्वीट करत त्यांनी आपली भूमिका स्पष्ट केली आहे.