ऑपरेशन टायगरनंतर शिंदेंकडून पुन्हा ऑपरेशन राबवलं जाणार असल्याची चर्चा होतेय. त्यात नगरसेवकांना फोडलं जाणार असल्याचा दावा केला जातोय. ठाकरे सेनेतील नगरसेवक शिंदे गटाच्या संपर्कात असून तेही लवकरच शिवसेनेत प्रवेश करतील असा दावा केला जातोय. ठाकरे गटातील बंडखोर खासदार संजय देशमुख यांनी दावा केलाय की, वाशिम आणि यवतमाळ येथील ५० नगरसेवकांनी आपल्याशी संपर्क केला असून त्यांनी शिंदे गटात सामील होण्याची इच्छा व्यक्त केली आहे.

माध्यमांशी बोलताना संजय देशमुख म्हणाले की, उद्धव बाळासाहेब ठाकरे पक्षातील संजय राऊतांचा दावा यवतमाळ-वाशिमचे खासदार संजय देशमुख यांनी फेटाळून लावलाय. सहा खासदार हे 85 कोटी रुपये आणि त्यांच्यावर केंद्रीय तपास यंत्रणेचा दबाव होता, त्यामुळे ते सत्ताधारी गोटात सामील झालेत असा दावा संजय राऊत यांनी केला होता. परंतु आपण निधीअभावी मतदारसंघातील अनेक प्रकल्प थांबले असल्यानं सत्तेत सहभागी झालो आहोत, असं देशमुख म्हणालेत.

50 नगरसेवक शिंदे गटात येणार - संजय देशमुख यांचा दावा

एनडीएला सध्या खासदारांची गरज नाही. त्यांच्याकडे संख्याबळ आहे. आम्ही विकासकामांसाठी त्यांच्यासोबत सामील झालो आहोत. एकनाथ शिंदे यांच्या पक्षात सामील झाल्यानंतर वाशिम आणि यवतमाल येथील 50 नगरसेवकांनी माझ्याशी संपर्क साधलाय. त्यांनी पक्षात सामील होण्याची इच्छा व्यक्त केली. ईडी-सीबीआयच्या दबावाचा प्रश्नच उद्भवत नाही. "आमच्याकडे तशा प्रकारची मालमत्ता नाहीये" असे संजय देशमुख म्हणाले.