सुशील थोरात, अहिल्यानगर

गेल्या काही दिवसांपासून राज्याचं राजकारण ढवळून निघत आहे. अशातच काही दिवसांपूर्वी धंगेकर यांनी मोहोळकरांवर आरोप केले होते. मात्र आता अहिल्यानगर शहरातील जैन समाजाची जागा आमदार संग्राम जगताप यांनी चुकीच्या पद्धतीने खरेदी करून लाटल्याचा आरोप उद्धव बाळासाहेब ठाकरेंच्या शिवसेनेचे शहरप्रमुख किरण काळे यांनी पुणे येथे केल्यानंतर राजकीय वर्तुळात खळबळ उडाली होती. मात्र, हे आरोप पूर्णपणे बिनबुडाचे आणि दिशाभूल करणारे असल्याचा दावा आता त्या जागेचे ट्रस्टी सुभाष मुथ्था आणि जागेचे भाडेकरू गणेश गोंडाळ यांनी केला आहे. त्यांच्या स्पष्टीकरणानंतर किरण काळे यांनी केलेल्या वक्तव्यावर प्रश्नचिन्ह निर्माण झाले आहे.

सदर जागा मंगूबाई होरा यांनी १९७५ साली जैन समाजाला दान केली होती. दानपत्र आणि मृत्युपत्रामध्ये स्पष्ट उल्लेख करण्यात आला आहे की, त्या जागेवर जे भाडेकरू राहतात त्यांना जोपर्यंत इच्छा असेल तोपर्यंत तेथेच राहता येईल आणि त्यांना जागेवरून कोणत्याही कारणास्तव हटविण्यात येऊ नये. त्या अनुषंगाने आजही त्या जागेवर गणेश गोंडाळ हे भाडेकरू म्हणून राहात असून, जागेचा ताबा किंवा मालकी बदल झालेली नाही. अशी माहिती ट्रस्टी सुभाष मुथ्था यांनी दिली.

१९७५ साली जेव्हा मंगूबाई होरा यांनी ही जागा जैन समाजाला दान केली, तेव्हाही त्या जागेवर भाडेकरू राहत होते. मृत्युपत्रामध्ये त्यांचा स्पष्ट उल्लेख करण्यात आला आहे. त्यामुळे त्या जागेची विक्री, खरेदी किंवा कोणत्याही प्रकारचा व्यवहार झालेला नाही. किरण काळे यांनी केलेले आरोप हे पूर्णतः खोटे असल्याचा दावा करण्यात आला आहे.

भाडेकरू गणेश गोंडाळ यांनी सांगितलं की मी आजही त्या जागेचा भाडेकरू आहे. तेथे असलेला ऑफिस देखील माझे आहे. माझ्या ऑफिसमध्ये आमदार संग्राम जगताप कधी कधी येतात, मात्र त्या ठिकाणी त्यांचे अधिकृत कार्यालय नाही. किरण काळे यांनी मृत्युपत्रातील भाडेकरूंचा उल्लेख जाणीवपूर्वक लपवून दिशाभूल करण्याचा प्रयत्न केला असल्याच सांगण्यात आले आहे.