Maharashtra Political News:

आमदार अपात्रता प्रकरणी विधानसभा अध्यक्ष राहुल नार्वेकर यांच्याविरोधात शिवसेना ठाकरे गटाने पुन्हा एकदा सुप्रीम कोर्टात धाव घेतली आहे. ठाकरे गटाने हे पाऊल उचलल्यानंतर आता राहुल नार्वेकरांनी आपला दौरा रद्द केल्याचं समजलं आहे. राहुल नार्वेकर पश्चिम आफ्रिकेतील घाना दौऱ्यावर जाणार होते मात्र त्यांनी हा दौरा रद्द केलाय. (Latest Marathi News)

शनिवारपासून ६६ वी राष्ट्रकुल संसदीय परिषद सुरू होत आहे. या परिषदेला उपस्थित राहण्यासाठी राहुल नार्वेकर या आठवड्याच्या सुरूवातीलाच घाना दौऱ्यावर जाणार होते. मात्र २५ सप्टेंबर रोजी झालेल्या सुनावणीमुळे नार्वेकरांनी तेव्हाही दौरा रद्द केला होता. तसेच आता पुन्हा एकदा त्यांनी पश्चिम आफ्रिकेतील घानामधील आपला दौरा रद्द केला आहे.

आमदार अपात्रता प्रकरणी पुढील सुनावणी १३ ऑक्टोबररोजी घेण्यात येणार आहे. यासाठीचं संभाव्य वेळापत्रक देखील जाहीर झालं आहे. त्यानुसार सुनावणीला ३ महिन्यांचा कालावधी किंवा पुढील वर्ष लागण्याची शक्यता आहे.

राहुल नार्वेकर मुख्य विषय सोडून इतर विषयांत वेळ घालवत आहेत असा आरोप करत ठाकरे गटाने आता न्यायालयात धाल घेतली आहे. ठाकरे गटाकडून दाखल याचिकेवर ६ ऑक्टोबर रोजी सुनावणी घेण्यात येणार आहे. त्यामुळे नार्वेकरांनी आपला दौरा रद्द केल्याचं म्हटलं जात आहे.