अक्षय गवळी, अकोला प्रतिनिधी

Maharashtra Police Officer Abuses BJP MLA Harish Pimple: अकोल्यातले भाजपचे मूर्तिजापूर मतदारसंघाचे आमदार हरीश पिंपळे यांना फोनवर शिवीगाळ केल्याचा प्रकार समोर आला आहे. अकोल्यातीलच बार्शीटाकळी पोलीस स्टेशनच्या ठाणेदाराने भाजप आमदाराला शिवीगाळ केल्याचा हा प्रकार आहे. शिवीगाळ केल्याचा भाजप आमदार हरीश पिंपळे यांनी आरोप केला आहे.. कत्तलीसाठी घेऊन जाणाऱ्या वाहनाची माहिती पोलिसांना दिल्यानंतर परस्पर पैसे घेत गुराचं वाहन सोडून देण्यात आलं, असल्याचे भाजप आमदार पिंपळे यांनी म्हटले. ठाणेदार अर्थातच पोलीस अधिकाऱ्याने शिवीगाळ केल्याची तक्रार पिंपळे यांनी गृहमंत्री देवेंद्र फडणवीस यांच्याकडे दिली आहे. शिवीगाळ करणाऱ्या ठाणेदारवर तात्काळ निलंबनाची कारवाई करावी, अशी कडकडीची विनंती त्यांनी एका ऑडिओ क्लिपमधून केली.

थेट मूर्तिजापूरचे भाजप आमदार हरीष पिंपळे यांनी गृहमंत्री देवेंद्र फडणवीस यांना ऑडिओ क्लिप पाठवत, शिवीगाळ करणाऱ्या ठाणेदारावर निलंबनाच्या कारवाईची मागणी केली आहे. आमदारासोबत असभ्य वर्तणूक केल्याप्रकरणी ठाणेदारवर तात्काळ कठोर कारवाईची पाऊले उचलावी, अन्यथा राजकीय क्षेत्रात आमदाराची इज्जत राहणार नाही, अशा शब्दात गृहमंत्र्याकडे त्यांनी मागणी केली आहे. व्हायरल होणाऱ्या ऑडिओ क्लीपमध्ये एक व्यक्ती भाजप आमदाराला असभ्य भाषेत शिवीगाळ करत असल्याचे समोर आलेय.

भाजप आमदारानं ऑडिओ क्लिपमध्ये नेमकं काय म्हटलं?

आपण, हरीश पिंपळे मूर्तिजापूर मतदारसंघाचे भाजपचा आमदार. माझाच कार्यकर्ता हरीश वाघ याने फोन करून कत्तलीसाठी गुरांची वाहतूक केल्या जात असल्याची माहिती अकोला जिल्ह्यातील बार्शीटाकळी पोलीस स्टेशनचे ठाणेदार यांना दिली होती. त्यानंतर बार्शीटाकळी पोलिसांनी पैसे घेत गुरांचे वाहन सोडून दिले. या संपूर्ण प्रकारानंतर आपण स्वतः अर्थातच आमदार हरीश पिंपळे यांनी ठाणेदाराला फोन केला. तर ठाणेदाराने आपल्यालाही शिवीगाळ केल्याचं गृहमंत्र्यांना सांगितलं. गृहखातं आपल्याकडे आहे, अशा शिवीगाळ करणाऱ्या ठाणेदारावर तात्काळ निलंबनाची कारवाई करावी. कारवाई झाली नाही तर राजकीय आमदारांची यापुढे इज्जत राहणार नाही. त्यामुळे अशा ठाणेदारावर कठोर कारवाई झाली पाहिजे, अशी कळकळीची विनंती, अपेक्षा भाजप आमदार हरीश पिंपळे यांनी गृहमंत्र्यांना ऑडिओ क्लिप द्वारे केली आहे.

शिवीगाळ प्रकरणी भाजप आमदाराच्या आरोपानंतर बार्शीटाकळी पोलीस स्टेशनचे पोलीस निरीक्षक यांच्याशी संपर्क करण्याचा प्रयत्न केला. पण त्यांनी कोणताही प्रतिसाद दिला नाही. नेमक पोलिसांकडून आमदाराला झालेली शिवीगाळ प्रकरण कुठल्या स्तरावर जातं हे पाहणं महत्त्वाचं असणार आहे. त्यात पोलिसावर काय कारवाई होतं? हे देखील पाहणं तितकच महत्त्वाचं असणार आहे.