राज्यात प्राध्यापकपदाच्या भरतीची प्रक्रिया सुरू असतानाच उच्च व तंत्र शिक्षण विभागाने महत्त्वाचा निर्णय घेतला आहे. महिला शिक्षणाला चालना देण्यासाठी उच्च व तंत्र शिक्षण विभागाने २०२६-२७ या शैक्षणिक वर्षासाठी २७ महिला पदवी महाविद्यालयांना मंजुरी दिली आहे. ही सर्व महाविद्यालये मुंबईतील श्रीमती नाथीबाई दामोदर ठाकरसी (एसएनडीटी) महिला विद्यापीठाशी संलग्न असणार आहेत.

राज्यात एकूण ३८ नव्या महाविद्यालयांना मान्यता देण्यात आली आहे. यामुळे ग्रामीण आणि निमशहरी भागात ही महाविद्यालये सुरू होणार असल्याने विद्यार्थिनींना घराजवळच उच्च शिक्षणाची संधी उपलब्ध होणार आहे. महाराष्ट्र सार्वजनिक विद्यापीठ अधिनियम २०१६ अंतर्गत 'नवीन महाविद्यालय मान्यता प्रणाली' (एनसीपीएस) द्वारे विद्यापीठांकडून प्रस्ताव मागविण्यात आले होते.

निकषांची पूर्तता करणाऱ्या ३८ प्रस्तावांना मंजुरी देण्यात आली आहे. मान्यता मिळालेल्या महाविद्यालयांमधील २७ महाविद्यालये एसएनडीटी विद्यापीठाशी संलग्न असणार आहेत. तर नागपूर येथील राष्ट्रसंत तुकडोजी महाराज नागपूर विद्यापीठाशी संलग्न ८ महाविद्यालयांनाही मान्यता मिळाली आहे. यासह जळगाव, अमरावती आणि छ. संभाजीनगर येथील प्रत्येकी एका महाविद्यालयालाही मंजुरी देण्यात आली आहे.

ही सर्व महाविद्यालये कायम विनाअनुदानित तत्त्वावर सुरू करण्यात येणार आहेत. या संबंधित संस्थांना 'इरादापत्र' देण्यात आलेत. दरम्यान या नव्या महाविद्यालयांमध्ये कला, वाणिज्य आणि विज्ञान शाखांचे विविध अभ्यासक्रम शिकवले जातील. यात बीएस्सी (विज्ञान व तंत्रज्ञान), बीएस्सी (होम सायन्स), बीए (मानव विज्ञान) आणि बीकॉम (व्यवस्थापन) या अभ्यासक्रमांना विशेष प्राधान्य देण्यात आले आहे.