Railway Budget 2023 : केंद्रीय अर्थमंत्री निर्मला सीतारमण यांनी नुकताच देशाचा अर्थसंकल्प सादर केला. या अर्थसंकल्पात त्यांनी रेल्वेसाठी २.४० लाख कोटी रुपयांची तरतूद केल्याची घोषणा केली. अर्थसंकल्पात त्यांनी महाराष्ट्रासाठीही मोठी घोषणा केली. राज्याच्या रेल्वे विकासासाठी १३ हजार ५३९ कोटींची तरतूद करण्यात आली आहे. (Latest Marathi News)

यामध्ये मराठवाड्यातील रेल्वे प्रकल्पासाठी सुमारे १६०० कोटी रुपयांची तरतूद करण्यात आली आहे. तर भुसावळ रेल्वे विभागासाठी १४७०.९४ कोटी रुपयांची तरतूद करण्यात आली आहे. केंद्रीय अर्थसंकल्पानंतर रेल्वे अर्थसंकल्पात महाराष्ट्राला किती टक्के रक्कम मिळेल, रेल्वेप्रकल्प राज्यात येतील याची अनेकांना उत्सुकता होती.

दरम्यान, आता केंद्र सरकारने महाराष्ट्रातील रेल्वे प्रकल्पासाठी आणि रेल्वेच्या इतर कामांसाठी १३ हजार ५३९ कोटींचा निधी दिला आहे. हा निधी महाराष्ट्राला मिळालेला आतापर्यंतचा सर्वात मोठा निधी असल्याचं केंद्रीय मंत्री आश्विनी वैष्णव यांनी सांगितलं आहे.

केंद्रीय मंत्री आश्विनी वैष्णव यांनी आज दिल्लीत पत्रकारपरिषद घेत ही माहिती दिली आहे. यंदाच्या अर्थसंकल्पात १३ हजार ५३९ कोटींचा निधी महाराष्ट्राला दिला आहे. वर्ष २००९ ते २०१४ या दरम्यानच्या कालावधीत महाराष्ट्रासाठी ११७० कोटींची तरतूद करण्यात आली होती. त्या तुलनेत महाराष्ट्रासारख्या प्रगत राज्यासाठी यंदा मोठी तरतूद आहे, असं त्यांनी सांगितलं आहे.

महाराष्ट्रातील कोणत्या रेल्वे स्थानकासाठी किती निधी?

जालना : १७० कोटी

नागपूर : ५८९ कोटी

औरंगाबाद : ३८० कोटी

ठाणे : ८०० कोटी

मुंबई सेंट्रल : ८५०

छत्रपती शिवाजी महाराज टर्मिनल : १८१३ कोटी