राज्यातील दुष्काळामुळे ग्रामीण भागातील रोजगारावर मोठा परिणाम होऊ लागलाय. खरीप हंगाम संपल्यानंतर शेतमजूर पीक तोडणीच्या कामासाठी गावाबाहेर स्थलांतर करतात. मात्र, यंदा दुष्काळामुळे नवरात्रीपूर्वीच ग्रामीण भागातल्या शेतमजूरांवर रोजगाराच्या शोधात स्थलांतराची वेळ आलीय़. स्थलांतराचं सर्वात मोठं संकट कोरड्याठाक मराठवाड्यावर ओढवलंय. दुष्काळानं हातचं पीक तर हिराऊन नेलंच मात्र शेतातला रोजगारही हिरावून नेलाय. त्यामुळे मजूर गावाबाहेर पडत आहेत..

दुष्काळात पिकं गेल्यामुळे कापूस वेचणी, सोयाबीन काढणीची कामंच उरलेली नाहीत

रब्बी हंगामाची कोणतीही शाश्वती नाही

उसाचे उत्पादन घटलं असून साखर कारखाने चालण्याचा कालावधी अर्ध्यावर आला

दरवर्षी हंगामाआधी जी उचल घेतली जाते, तीसुद्धा फीटण्याची यंदा खात्री नाही

दुष्काळामुळे स्थलांतराची वेळ आलीय. त्याळे केवळ रोजगाराचाच नव्हे तर विद्यार्थ्यांच्या शाळेचा गंभीर प्रश्न निर्माण झालाय. रोजगाराची संधी शोधण्यासाठी मजुरांनी शहराची वाट धरली खरी. मात्र तिथंही कामासाठी संघर्ष करावा लागत असल्यामुळे दुष्काळग्रस्त दुहेरी संकटात साप़डाय. सणासुदीच्या काळात घरापासून दूर जाऊन काम करण्याची वेळ आल्याने मजूर कुटुंबांसमोर आर्थिक अडचणीही निर्माण होत आहेत. शेतात कामेच उरली नसल्यानं रोजगार हमी योजनेतून कामे देण्याची मागणी शेतमजूरांकडून केली जातेय. खरंतर, या मजुरीच्या पैशावर शेतमजूरांच्या कुटुंबीयांची आर्थिक गणितं अवलंबून असतात. त्यामुळे यंदा जास्तीत जास्त शेतकरी आणि मजुरांना रोजगार हमी योजनेत सामावून घेऊन दिलासा देण्याची गरजेचं आहे...