सातारा, सांगली आणि अहिल्यानगरमधील जिल्हा बँकेच्या निवडणुकीत मविआ आणि महायुतीमध्ये बिनविरोध निवडणुकीसाठी जोरदार रस्सीखेच सुरू आहे. सातारा जिल्हा मध्यवर्ती बँकेच्या एकूण 21 जागांपैकी 9 जागा बिनविरोध तर 12 जागांवर निवडणूक होणार आहे. दरम्यान, 10 वर्ष संचालक राहिलेल्या उमेदवारांना पुन्हा निवडणूक लढवता येणार नसल्यानं सातारा जिल्हा बँकेच्या निवडणुकीमध्ये मोठा ट्विस्ट आला. आणि आमदार शिवेंद्रराजे भोसले, रामराजे नाईक निंबाळकर आणि उदयनराजे भोसले यांच्यासह अनेक नेत्यांनी या निवडणुकीतून माघार घेतली.

तर दुसरीकडे, सांगलीत महायुती आणि मविआ नेत्यांच्या बैठकीनंतर शरद पवारांच्या राष्ट्रवादीच्या नेत्या सुमन पाटलांनी महिला गटातून दाखल केलेला उमेदवारी अर्ज मागे घेतलाय. त्यामुळे जिल्हा मध्यवर्ती बँकेच्या निवडणुकीत 21 पैकी 19 जागा बिनविरोध तर 2 दोन जागांवर निवडणूक होणार आहे. शरद पवारांच्या राष्ट्रवादीचे आमदार जयंत पाटलांच्या नेतृत्वाखाली महायुती आणि मविआचं समविचारी पॅनल एकत्र आलंय.

इतकंच नव्हे तर अहिल्यानगर जिल्हा बँक निवडणुकीत बिनविरोधसाठी 8 जागांवरील पेच सुटलाय..मात्र, उर्वरित 13 जागांचा तिढा अद्याप कायम आहे. जिल्हा बँक निवडणूक बिनविरोध करण्यासाठी आजी-माजी आमदार-खासदारांमध्ये बैठकांचं सत्र पाहायला मिळालं. मात्र, जिल्हा बँक निवडणुकीसाठी काही जागांसाठी लढत अटळ असल्याचा अंदाज वर्तवला जातोय.

सलग 10 वर्षे संचालकपदी राहिलेल्या विद्यमान संचालकांना आता RBIच्या नियमामुळे निवडणुक लढवता येणार नाही... त्यामुळे जिल्हा मध्यवर्ती बँकेच्या निवडणुकीतून दिग्गजांना माघार घ्यावी लागलीये. अशातच काही ठिकाणी नवीन चेहऱ्यांना संधी मिळतेय... मात्र, तरीही सत्ता टिकवण्यासाठी निवडणूका बिनविरोध होण्याची शक्यता मावळलीये. त्यामुळे जिल्हा मध्यवर्ती सहकारी बँकांच्या निवडणुकीत कुणाचं पारडं जड होणार, हे पाहणं महत्त्वाचं असणार आहे.