रणजित माजगावकर, साम टीव्ही, प्रतिनिधी

Kolhapur : कोल्हापूरच्या शिरोळ तालुक्यातील नांदणी गावामधील महादेवी (माधुरी) हत्तीण वनतारामध्ये पाठवण्यात आली आहे. नांदणी येथील स्वस्तिश्री भट्टारक पट्टाचार्य महास्वामी संस्थान मठामधील महादेवी हत्तीणीला पोलीस बंदोबस्तामध्ये गुजरातच्या वनतारामध्ये रवाना करण्यात आल्यानंतर कोल्हापुरामध्ये संतापाची लाट उसळली. लाडक्या महादेवी हत्तीणीला परत घेऊन येण्यासाठीचे प्रयत्न सुरु झाले आहेत.

महादेवी (माधुरी) हत्तीणीला परत आपल्या घरी आणण्यासाठी काँग्रेसचे विधानपरिषदेतील गटनेते आमदार सतेज पाटील यांनी स्वाक्षरी मोहीम सुरु केली होती. या मोहिमेमध्ये कोल्हापूर जिल्ह्यातील सव्वा दोन लाखांहून अधिक नागरिकांनी सहभाग घेतला. आपली महादेवी नांदणी मठातच राहिली पाहिजे असा संदेश या निमित्ताने देण्यात आला.

दोन दिवसांपूर्वी सुरु केलेल्या स्वाक्षरी मोहिमेला कोल्हापूरकरांनी उदंड प्रतिसाद दिला आहे. तब्बल दोन लाख चार हजार चारशे एकवीस कोल्हापुरकरांनी महादेवीला/ माधुरीला परत आणण्यासाठीच्या फॉर्ममध्ये स्वाक्षरी दिली. आज रमणमळा पोस्ट ऑफिस येथे हे सर्व फॉर्म भारताच्या राष्ट्रपती दौपद्री मुर्मू यांना पाठवण्यात आले.

आमदार सतेज पाटील, माजी आमदार ऋतुराज पाटील यांच्यासह काँग्रेसच्या कार्यकर्त्यांनी टेम्पोतून हे सर्व सह्यांचे फॉर्म असलेले बॉक्स पोस्ट ऑफिसमध्ये घेऊन आलेत. यावेळी त्यांनी हे सर्व बॉक्स राष्ट्रपतींना पाठवा अशी देखील विनंती केली. जोपर्यंत महादेवी हत्तीणीला नांदणी येथे परत आणलं जात नाही तोपर्यंत विविध मार्गाने हे आंदोलन असेच सुरू राहणार असल्याचे काँग्रेसचे आमदार सतेज पाटील यांनी सांगितले आहे.