कालपासून दहावीच्या परीक्षांना सुरूवात झाली आहे. याच दरम्यान डोंबिवली एमआयडीसी मिलापनगरमधील डॉ. यू. प्रभाकर राव स्पोर्ट्स अकॅडमीच्या क्रीडांगणावर शनिवार सकाळपासून क्रिकेट मॅचेस सुरू होत्या. यावेळी मोठमोठ्या आवाजात गाणी तसेच समालोचन सुरू होते. या क्रीडांगणाजवळच असलेल्या ग्रीन्स स्कूलमध्ये दहावीच्या विद्यार्थ्यांची परीक्षा सुरू होती.

लाऊडस्पीकरच्या मोठमोठ्या आवाजामुळे विद्यार्थ्यांना पेपर लिहिण्यास अडथळा निर्माण होत होता. यानंतर ग्रीन्स स्कूल प्रशासनाने तत्काळ पोलीस ठाण्यात धाव घेतली. शालेय प्रशासनाच्या तक्रारीनंतर लाऊडस्पीकर बंद करण्यात आले.

शाळेत दहावीच्या विद्यार्थ्यांचे पेपर सुरु असताना अशा प्रकारे जोरजोरात लाऊडस्पीकर लावणे कितपत योग्य आहे? लाऊडस्पीकरच्या आवाजाने विद्यार्थ्यांचे लक्ष विचलित होत होते. संबंधीत मॅच आयोजकांना याची साधी कल्पनाही नव्हती का? असा संतप्त सवाल पालकवर्ग तसेच विद्यार्थांकडून विचारण्यात येत आहे.

Edited By - Purva Palande