लातुर : महाराष्ट्र राज्य परिवहन महामंडळाच्या कर्मचाऱ्यांच्या आंदोलनाचा आज सहावा दिवस आहे. सर्व देशभरात दिवाळी धुमधडाक्यात आनंदाने साजरी करत आहेत; पण एसटी कर्मचारी आंदोलनात असल्याने एसटी डेपोसमोर खिचडी खाऊन दिवाळी साजरी करत आहे. (latur-news-msrtc-worker-strike-Diwali-in-front-of-ST-employees-depot-after-eating-khichdi)

लातुर जिल्ह्यातील एकूण पाच आगारातील सर्व आगारातील बसेस बंद आहेत. औसा तालुक्याच्या एसटी डेपोसमोर पुरुष आणि महिला कर्मचारी आता कोणी कोथिंबीर निवडत, कांदा चिरत, मिरच्या निवडतेय तर कोणी तांदूळ निवडत खिचडीची तयारी करत अत्यंत दुःखात दिवाळी साजरी करत आहेत. त्याच्या घरात मुलंबाळ आई बाबा फटाके आणतील लाडू चिवडा आदींचा मोठ्या आनंदात फराळ खायला मिळेल या आशेवर असताना नाईलाजाने एसटी कर्मचारी हक्काच्या मागण्यांसाठी आज सहाव्या दिवशी आंदोलनात आहे.

आंदोलन पहिले मग दिवाळी

राज्‍य परिवहन महामंडळातील कर्मचारींची दिवाळी तशी बाहेरच साजरी होत असते. परंतु, वेळातवेळ काढून परिवारासोबत दिवाळी साजरी करण्याचा आनंद देखील घेत असतात. मात्र मागण्यांसाठी आंदोलन पुकारले असल्‍याने काही ठिकाणी आंदोलन सुरूच आहे. यामुळे आंदोलन सोडून घरी जाता येत नाही. यामुळेच दिवाळी बस आगारात साजरी करावी लागत आहे. राज्य शासनाने एसटी कर्मचाऱ्यांच्या अवस्थेची दखल घेत सकारात्मक आणि धोरणात्मक निर्णय घ्यावा अशी अपेक्षा एसटी आंदोलक व्यक्त करत आहेत.