सातारा : गेल्या दाेन दिवसांपासून सातारा (satara) जिल्ह्यात पावसाची (Rain) संततधार सुरु आहे. पावसामुळे सखल भागात माेठ्या प्रमाणात पाणी साचत आहे. जिल्ह्यातील नदी, नाले भरुन वाहु लागले आहेत. जिल्ह्यातील पाटण (Patan) तालुक्यात भुस्खलनाच्या घटना घडल्या आहेत. या घटनेनंतर आणि त्यापुर्वी प्रशासनाने ग्रामस्थांना सुरक्षितस्थळी हलविलं आहे. (Satara Rain Latest Update)

पाटण तालुक्यातील काटे अवसरी परिसरातील खुडपुले वाडी येथे जाणाऱ्या रस्त्यावर भुस्खलन झाले. घटनास्थळी प्रांताधिकारी सुनिल गाढे यांनी भेट दिली. गाढे यांनी सहका-यासमवेत तेथील रस्ता एकेरी सुरू केला. त्यानंतर या भागातील धाेका लक्षात घेता तेथील ग्रामस्थांशी चर्चा केली. या चर्चेअंती ग्रामस्थांचे तात्पुरत्या स्वरुपात स्थलांतर करण्यात आले. स्थलांतरित केलेल्या ग्रामस्थांना सुविधा दिल्या जात असल्याची माहिती प्रशासनाने दिली.

जितकरवाडी (ता.पाटण) येथे भुसख्खलन होण्याची शक्यता असल्याने खबरदारीचा उपाय म्हणून प्रशासनाने येथील ग्रामस्थांना जिंती येथील शाळेत तात्पुरत्या स्वरूपात स्थलांतरित केले आहे. स्थलांतरित ग्रामस्थांना प्रशासनाच्या माध्यमातून सोयी-सुविधा उपलब्ध करुन देण्यात आल्या आहेत अशी माहिती प्रांताधिकारी सुनिल गाढे यांनी दिली.

जिल्हा आपत्ती व्यवस्थापनाने दिलेल्या माहितीनूसार जिल्ह्यातील विविध भागात चांगला पाऊस झाला आहे. तसेच काही भागात सुरु आहे. आज (साेमवार) सकाळी आठ वाजेपर्यंत 65 मिली मीटर पेक्षा जास्त पाऊस नोंदविलेली ठिकाणे.

महाबळेश्वर 107.3 मिली मीटर

पाटण 101.3

परळी 74.8

बामणोली 76

महावशी 68.5

हेळवक 131.8

मरळी 65.8

मोरगिरी 96.8

मल्हारपेठ 65.8

तापोळा 65.5

लामज (गाव) 118.3

Edited By : Siddharth Latkar