मुख्यमंत्री लाडकी बहीण योजना राज्यात सुपरहीट ठरली. दरमहा १५०० रूपये लाभार्थी महिलांच्या बँक खात्यात जमा होतात. सत्ता स्थापन झाल्यानंतर १५०० नसून २१०० रूपये दिले जातील असं आश्वासन महायुतीच्या सरकारमधील काही नेत्यांनी दिलं होतं.

मात्र, अद्याप सरकारकडून कोणत्याच प्रकारची घोषणा करण्यात आलेली नाही. यावरून विरोधक सत्ताधाऱ्यांना धाऱ्यावर धरत आहेत. अशातच ठाकरे गटाचे खासदार संजय राऊत यांनी लाडकी बहीण योजना फसवी आहे, अशी टीका त्यांनी केली आहे.

'लाडकी बहीण योजना फसवी आहे. हे आपण निवडणुकीनंतर पाहिलं असेल. महायुती सरकार निवडणुकीनंतर लाडक्या बहि‍णींना २१०० रूपये देणार होते. आता संबंधित खात्याच्या मंत्री महिला आहेत. त्यांनी ते शक्य नाही असं सांगितलं. ही महिलांची फसवणूक आहे', असं संजय राऊत म्हणालेत.

वृद्ध कलाकार रडत होते

'मला काही वृद्ध कलाकार भेटले होते. त्यांना दर महिन्याला सरकारकडून काही मानधन मिळतं. त्यांनी मला सांगितलं की, लाडकी बहीण योजना अंमलात आल्यापासून वृद्ध कलाकारांना त्यांचं मानधन मिळालेलं नाही. या राज्याची ही आर्थिक अवस्था आहे. हे राज्य कर्जाच्या ओझ्याखाली चिरडतंय. वृद्ध कलाकार माझ्याकडे अक्षरक्ष: रडत होते', असं संजय राऊत म्हणालेत.

'महायुती सरकारनं महिलांना २१०० रूपये द्यायचं कबूल केलं होतं. पण हे सरकार १५०० वरून २१०० रूपये पैसे द्यायला तयार नाहीत. मुख्यमंत्री लाडकी बहीण योजनेतून ५ लाख महिलांची नावे वगळण्यात आली आहेत. मग ही योजना फसवी नाही का?' असा सवाल संजय राऊत यांनी उपस्थित केलाय.