संजय जाधव, साम प्रतिनिधी

राज्य सरकारची 'लाडकी बहीण योजनेला महिलांकडून मोठा प्रतिसाद मिळत आहे. त्याचवेळ मात्र ही योजना वादात सापडलीय. या योजनेचा लाभ घेण्यासाठी मराठी भाषेत योजनेचे भरलेले अर्ज रद्द करण्यात येत आहे. याबाबतचा जाहीर आदेश बुलढाण्याचे तहसीलदार यांनी काढलेत. यामुळे ही योजना वादात सापडली असून तहसीलदारांनी काढलेल्या आदेशाचा विरोध बुलढाणा जिल्ह्यातील मनसेने केलाय. मनसैनिकांनी हाताला काळ्या फिती बांधून या निर्णयाचा निषेध केला.

राज्य शासनाची महत्त्वकांक्षी असलेली " लाडकी बहीण योजना " शासनाच्या एका नवीन निर्णयामुळे पुन्हा वादात सापडलीय. बुलढाणा जिल्ह्यातील अनेक ठिकाणी मराठीतून भरलेले लाभार्थींचे अर्ज रद्द करण्यात यावे अशा लेखी सूचना प्रशासनाने दिल्यामुळे महाराष्ट्र नवनिर्माण सेना आक्रमक झालीय.

लाखो महिला भगिनींनी मराठीतून अर्ज भरलेले आहेत, आता हे अर्ज बाद होण्याच्या भीतीने आणि मराठी भाषेचा अपमान होत असल्याच्या भावनेने मनसे पदाधिकाऱ्यांनी काळ्याफिती लावून शासनाच्या निर्णयाचा निषेध केला. यासंबंधी त्यांनी जिल्हाधिकाऱ्यांना निवेदन दिले आहे.