लाडकी बहिण योजनेत लाखो लाभार्थ्यांनी निकषात बसत नसतानाही आणि आर्थिक स्थिती उत्तम असतानाही योजनेत घुसखोरी केली आहे. मात्र आता शासनाच्या तिजोरीतून लूट करणाऱ्या बोगस लाडकींना आता शोधून काढलं जातयं. ऑनलाइन ग्राहक ओळख म्हणजेच ई-केवायसी करण्याची मुदत 30 एप्रिलपर्यंतच आहे.यासाठी महिला विकास विभागाने आत्तापर्यंत तीन वेळा मुदतवाढ दिली आहे.

26 लाख बहिणी अपात्र?

- राज्यात 26 लाख 34 हजार लाडक्या बहिणींवर अपात्रतेची टांगती तलवार

- कागदपत्रांच्या कमतरतेमुळे लाखो महिलांची e-KYC प्रक्रिया रखडली

- ई-केवायसीसाठी शेवटचे 4 दिवस शिल्लक, 30 एप्रिलला मुदत संपणार

- चुकीची माहिती देऊन लाभ घेणाऱ्यांकडून 165 कोटी वसुलीचा सरकारचा निर्णय

- 12 हजार 415 सरकारी महिला कर्मचाऱ्यांनीही घेतला लाडकी बहिणीचा लाभ

योजनेचा लाभ घेणाऱ्या सरकारी कर्मचाऱ्यांवर शिस्तभंगाची कारवाई केली जाणार आहे. त्यांच्याकडून वसुलीलाही सुरुवात झाली असून आत्तापर्यंत 6 हजार 457 महिलांकडून 11 कोटी रुपये वसूल करण्यात आलेत. दुसरीकडे 12 हजार 757 पुरुषांनीही योजनेचा लाभ घेतलाय. सरकारचे 22 कोटी 96 लाख रुपये त्यांनी लाटले आहेत. त्यांच्याकडून वसुली केव्हा होणार ? हा सवाल आहे. काटेकोर निकष लावुन पडताळणी सुरु असल्याने आणि ई-केवायसीमुळे दोन कोटी 47 लाख लाभार्थांपैकी मोठ्या प्रमाणावर लाडक्या बहिणी अपात्र ठरण्याची शक्यता आहे. त्यामुळे गरजु महिलांनाच योजनेचा लाभ देण्याचं उद्दीष्ट्य पूर्ण होणार का? हाच खरा प्रश्न आहे.