महाराष्ट्रात लाडकी बहीण योजनेची जोरदार चर्चा सुरु आहे. ही योजना महाराष्ट्र राज्य सरकारकडून लागू करण्यात आली आहे. या योजनेचा पुढील हफ्ता कधी येणार, याकडे लाडक्या बहिणींचं लक्ष लागून आहे.

हिवाळी अधिवेशनात लाडकी बहीण योजनेचा हफ्ता कधी येणार, याबाबत घोषणा करण्यात आली होती. आजपासून हा हफ्ता मिळण्याची प्रोसेस सुरु झाली आहे.

लाडक्या बहिणींना दिवाळी आणि निवडणुका असल्यामुळे २ महिन्यांचा हफ्ता एकत्र देण्यात आला होता. त्यानंतर लाडक्या बहिणी डिसेंबरच्या हफ्त्याची आतुरतेने वाट पाहत होते. ही प्रक्रिया काही दिवसांसाठी थांबवण्यात आली होती.

आता ही प्रक्रिया पुन्हा सुरु झाली असल्याची माहिती महिला व बालकल्याणमंत्री आदिती तटकरे यांनी दिली आहे. आपल्या अधिकृत एक्स अकाऊंटवर पोस्ट शेअर करत त्यांनी ही माहिती दिली आहे. ही योजना महिलांना आर्थिकदृष्ट्या सक्षम बनवणारी योजना असल्याचं त्यांनी सांगितलं आहे.

आदिती तटकरे काय म्हणाल्या?

आदिती तटकरे यांनी पोस्ट शेअर करत लिहिले,' महिला सशक्तीकरणाच्या दिशेने एक पाऊल टाकत, राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या नेतृत्वाखाली सुरु करण्यात आलेली लाडकी बहीण योजना पुन्हा एकदा सुरुवात करण्यात आली आहे. विधानसभा निवडणुकीमुळे ही थांबवण्यात आलेली योजना पुन्हा एकदा सुरु करण्यात आली आहे.

या यादीत २ कोटी ३४ लक्ष महिलांचा समावेश तर असणारच आहे. यासह ज्या महिलांना आधार सिडिंगमुळे या योजनेपासून वंचित राहावं लागलं होतं. त्या महिलांना देखील योजनेचे पैसे मिळणार असल्याचं आदिती तटकरे यांनी सांगितलं आहे.

१५०० मिळणार की २१००?

लाडकी बहीण ही योजना जुलै महिन्यात सुरु करण्यात आली होती. सुरुवातीला महिलांना १५०० रुपये दिले गेले होते. त्यानंतर दिवाळी आणि निवडणुका पाहता २ महिन्यांचे ३००० रुपये एकत्र देण्यात आले होते. आता डिसेंबरचा हफ्ता आजपासून अकाऊंटमध्ये यायला सुरुवात होणार आहे. यावेळीही लाडक्या बहिणींना १५०० रुपये मिळणार असल्याचं म्हटलं जात आहे.