विनायक वंजारे, सिंधुदुर्ग

कोकणवासीयांसाठी आनंदाची बातमी! मुंबईतून कोकणात जाण्यासाठी तब्बल ७ ते ८ तासांचा कालावधी लागतो, मात्र येत्या १५ ऑगस्ट पासून हा वेळ वाचणार आहे. कोकणातील नागरिक फक्त १ तासात कोकणात पोहचू शकतात. कारण १५ ऑगस्ट पासून सिंधुदुर्गातील चिपी विमानतळावरून नवी मुंबईपर्यंतची विमानसेवा सुरु होणार आहे. यामुळे प्रवाशांना त्यांचा प्रवासाचा वेळ वाचवता येणार आहे. दरम्यान गणेशोत्सव अगदी काही महिन्यांवर येऊन ठेपला असून या निर्णयामुळे प्रवाशांना दिलासा मिळाला आहे.

नितेश राणे यांनी सांगितले की, १५ ऑगस्टपूर्वी फ्लाय ९१ ही विमान कंपनी चिपी ते नवी मुंबई अशी सेवा सुरू करणार आहे. त्यानंतर लवकरच इंडिगोची विमानसेवाही या मार्गावर उपलब्ध होईल. यामुळे सिंधुदुर्ग जिल्हा विकासाच्या आणखी एका महत्त्वाच्या टप्प्यावर पोहोचत असल्याचे त्यांनी नमूद केले. सध्या चिपी विमानतळावरून पुणे, हैदराबाद आणि बेंगळुरू या शहरांसाठी विमानसेवा उपलब्ध आहे.

शनिवार आणि रविवार वगळता इतर सर्व दिवशी ही सेवा सुरू असते. मात्र गेल्या दोन वर्षांपासून मुंबई ते सिंधुदुर्ग ही थेट विमानसेवा बंद असल्यामुळे प्रवाशांना मोठ्या अडचणींचा सामना करावा लागत होता. विशेषतः मुंबईत राहणाऱ्या कोकणवासीयांना आपल्या गावी ये-जा करण्यासाठी रस्ते किंवा रेल्वे मार्गावर अवलंबून राहावे लागत होते.

आता नवी मुंबई विमानतळावरून सिंधुदुर्गसाठी विमानसेवा सुरू होत असल्याने प्रवासाचा वेळ मोठ्या प्रमाणात कमी होणार आहे. याचा फायदा केवळ स्थानिक नागरिकांनाच नाही तर, व्यावसायिक, गुंतवणूकदार आणि पर्यटकांनाही होणार आहे. सिंधुदुर्ग जिल्ह्यातील समुद्रकिनारे, ऐतिहासिक किल्ले, धार्मिक स्थळे आणि नैसर्गिक सौंदर्य पाहण्यासाठी दरवर्षी मोठ्या संख्येने पर्यटक येत असतात. दरम्यान विमान सेवा सुरु झाल्याने पर्यटकांना मुंबईतून सिंधुदुर्गमध्ये पोहोचणे अधिक सोपे होईल.