कोल्हापूर जिल्ह्यातून एक संतापजनक घटना समोर येत आहे. एका अल्पवयीन मुलीवर जादूटोण्याच्या नावाखाली भोंदूबाबाने लैंगिक अत्याचार केला आहे. नोकरी आणि आर्थिक मदतीचे आमिष दाखवून त्याने हे कृत्य केले आहे. या प्रकरणाची माहिती पोलिसांना मिळाल्यानंतर कोडोली पोलीसांनी तिघांना अटक केली असून, त्यांच्याविरोधात पॉक्सो अंतर्गत गुन्हा दाखल केला आहे. या धक्कादायक घटनेनंतर ग्रामस्थांनी रोष व्यक्त केला आहे.

नेमकं प्रकरण काय?

अल्पवयीन मुलगी ही हातकणंगले तालुक्यातील एका गावातील रहिवासी असल्याची माहिती आहे. तरूणी गरीब कुटुंबातील असून, तरूणीला नोकरी लागावी आणि आर्थिक आधार मिळावा, यासाठी एका एजंट महिलेशी तिची भेट घडवून दिली. तिला भोंदू बाबाजवळ नेण्यात आले. हा भोंदू बाबा करवीर तालुक्यातील सांगरुळ येथील रहिवासी असल्याची माहिती आहे.

भोंदू बाबाने नोकरी आणि आर्थिक मदतीचे आमिष तरूणीला दाखवले. हेच आमिष दाखवून त्याने तरूणीवर वारंवार लैंगिक अत्याचार केला. या प्रकरणाची माहिती पोलिसांना मिळाल्यानंतर त्यांनी आरोपींची शोध घेण्यास सुरूवात केली.

भोंदू बाबा विरोधात गुन्हा दाखल

पोलिसांनी अल्पवयीन मुलीची चौकशी करून तीन आरोपींना अटक केली आहे. भोंदूबाबा राजू उर्फ राजाराम भिकाजी तावडे, एजंट सुप्रिया हिम्मत पवार आणि वाहन चालक मनोज अशोक असे आरोपींची नावे आहेत. या तिघांना पोलिसांनी ताब्यात घेत न्यायालयात हजर केले. या तीन आरोपींना न्यायालयाने तीन दिवसांची पोलीस कोठडी सुनावली आहे. तसेच आरोपींवर पोक्सो अंतर्गत गुन्हा दाखल करण्यात आला आहे.

ह्यूमन राईट संस्थेचा पुढाकार

या गंभीर घटनेची माहिती पोलिसांना मिळताच ह्यूमन राईट संस्थेनेही पुढाकार घेतला. तसेच पोलिसांकडे आरोपींविरोधात तक्रार दाखल केली. संस्थेच्या सहकार्याने गुन्हा दाखल केला असून, पीडितेला मदत आणि संरक्षण देण्याची प्रक्रिया सुरू करण्यात आली आहे.