आजकाल प्रत्येकाला रिलचं वेड लागलंय. अनेक जण रिल करतात, अपलोड करतात आणि फेमसही होतात. मात्र, रिलमुळे वादात अडकण्याची देखील शक्यता असते. आता कोल्हापूरच्या एका तरूणानं केलेला व्हिडिओच पाहा. जिल्हा परिषदेच्या शाळेत सिंघम डायलॉगवर एकानं व्हिडिओ केला अन् नव्या वादला तोंड फुटलं. या व्हायरल व्हिडिओवर अनेकांनी संतप्त प्रतिक्रिया दिल्या असून, मुख्याध्यापकांनी फोटो काढण्यासाठी परवानगी दिल्यामुळे रोष व्यक्त करण्यात येत आहे.

सुरक्षेचा प्रश्न ऐरणीवर

जिल्हा परिषद शाळांमधील सुरक्षेचा प्रश्न ऐरणीवर आला असताना, सिंघम डायलॉगवर व्हिडिओ केल्यानं ग्रामस्थांनी संताप व्यक्त केला आहे. व्हायरल रिलमध्ये शाळेतील खुर्चीला लाथ मारून, तरूण सिंघम चित्रपटातील डायलॉग बोलत आहे. तसेच शाळेतील इतर साहित्यांचा देखील वापर करत आहे. त्याच्यासोबत आणखीन असलेले तरूण देखील रिलमध्ये अॅक्टिंग करताना दिसत आहेत.

रिल तयार करताना एका तरूणानं खुर्चीला लाथ मारली. जिथं आपण शिकलो, तिथं लाथ मारल्यासारखा प्रकार घडल्यानं ग्रामस्थांनी संतप्त प्रतिक्रिया व्यक्त केलीय. तसंच रिलसाठी शाळेतील इतर साहित्यांचा देखील वापर करण्यात आला आहे. हा रिल तयार करण्यासाठी परवानगी मुख्याध्यापकांनीच दिली असल्यानं संतापात आणखीन भर पडलीय. या प्रकरणानंतर ग्रामस्थांनी विरोध दर्शवला आहे.

शाळेच्या सुरक्षेची चिंता व्यक्त

जिल्हा परिषद शाळांमध्ये, शाळेच्या सुरक्षेसाठी सीसीटिव्ही फुटेज बसवण्यात आले आहेत. तरी देखील शाळेचा वापर रिल्स करण्यासाठी झाल्यानं, अशा वेळी शाळा समिती काय करत होती? असा प्रश्न ग्रामस्थांनी उपस्थित केलाय. मुख्याध्यापकांना शाळेच्या सुरक्षेची चिंता नाही का? असे व्हिडिओ किंवा फोटो काढायला मुख्याध्यापक परवानही देऊच कसे शकतात? असे अनेक प्रश्न उपस्थित होत आहे.