रणजित माजगावकर/ सुशील थोरात 
कोल्हापूर/ अहिल्यानगर : देवदर्शनाला जाणारे भाविक मंदिरात भरभरून दान देत आहेत. रोख रकमेसह सोने- चांदीचे दागिने देवाच्या चरणी अर्पण करत असतात. यात करवीर निवासिनी श्री अंबाबाई मंदिरात साधारण दोन कोटी रुपयांचे दान करण्यात आले आहे. तर अहिल्यानगर जिल्ह्यातील जगदंबा देवी मंदिरात दोन किलो सोन्याचा मुकुट अर्पण करण्यात आला आहे. 

साडेतीन शक्तीपीठांपैकी एक असलेल्या अंबाबाई मंदिरात नेहमीच गर्दी असते. मागील महिन्यात नवीन वर्षाची सुरुवात अनेकांनी आई अंबाबाईचे दर्शनाने केली होती. सार्वजनिक सुट्ट्यांसह शनिवार आणि रविवारचा आकडा एक लाखाच्या घरात होता. येथे आलेल्या भाविकांनी अंबाबाई चरणी भरभरून दान केले आहे. त्यामुळे अंबाबाई चरणी २ कोटींचे दान मागील दीड महिन्यात पाहायला मिळाले.

रोख रकमेची मोजणी पूर्ण 

करवीर निवासिनी अंबाबाई मंदिरात असलेल्या तेरा दानपट्ट्यांमध्ये भाविकांनी देणगी स्वरूपात दान केलेल्या रोख रकमेची मोजणी सोमवारी पूर्ण झाली आहे. यात गेल्या दीड महिन्यात भाविकांनी अंबाबाई चरणी २ कोटी १ लाख ५९ हजार २०० रुपयांचे दान दिल्याची नोंद या मोजणीद्वारे करण्यात आली. मंदिरातील कारंजा चौकातील मंडपात मागील चार दिवसांपासून पश्चिम महाराष्ट्र देवस्थान समितीच्या वतीने ही मोजणी करण्यात आली. 

जगदंबा मंदिरात २ किलो सोन्याचा मुकुट
अहिल्यानगर : देशाच्या दक्षिणेकडील राज्यांमध्ये प्राचीन देवीचे मंदिर अशी ओळख असणारे कर्जत तालुक्यातील राशीन येथील श्री जगदंबा देवी मंदिरामध्ये शतचिंडी महोत्सव सुरू आहे. यानिमित्ताने मंदिरामध्ये सोन्याचा कळस तसेच देवीला दोन किलो सोन्याच्या वजनाचा देवीचा मुखवटा जगदंबा देवी सेवा संस्थांच्या वतीने प्राणप्रतिष्ठा कार्यक्रम मोठ्या उत्साहात संपन्न झाला. मिरवणूक काढत मुखवट्याची प्राणप्रतिष्ठा करण्यात आली. मंदिरामध्ये शतचिंतडी यज्ञ सोहळा आणि सहस्त्र प्राकृतिक सप्तशती पाठ सोहळा याचे देखील आयोजन करण्यात आले होते.