स्नेहील झणके, साम टीव्ही

कोल्हापूर : लोकसभा निवडणुकीत मुस्लिम मतदारांमुळे मविआला घवघवीत यश मिळालं. या मुस्लिम मतांचं महत्व महायुतीला कळल्यामुळे त्यांनीही बुरखा वाटपाचे कार्यक्रम घेत मुस्लिस मतदारांना आकर्षित करण्याचा कार्यक्रम घ्यायला सुरुवात केली. परंतु कोल्हापुरच्या शिंगणापूर ग्रामसभेत चक्क मुस्लिम मतदारांना नाकारण्याचा धक्कादायक प्रकार घडलाय.

त्याच झालं असं की, शिंगणापूरच्या ग्रामसभेत मुस्लिम मतदारांची नवीन नावं मतदार यादीत समाविष्ट करु नये, असा ठराव मांडला गेला. या ठरावावर टीका झाल्यानंतर गावात बांग्लादेशी महिला असल्यामुळे त्यांची नावं मतदार यादीत घेऊ नका, असा अटकाव करण्यासाठी आम्ही ठराव केल्याची सारवासारव सरपंच रसिका पाटील यांनी केली. तर ठराव करणारे कोणत्या पक्षाचे आहेत याचा शोध घ्या, असं सांगत याप्रकरणी गुन्हा दाखल करुन कारवाईची पवारांच्या राष्ट्रवादीचे आमदार जितेंद्र आव्हाडांनी केली.

या निमित्तानं साम टीव्हीनं काही सवाल उपस्थित केले आहेत. मुळात जर त्या कथित महिला बांग्लादेशी असतील तर त्यांची पोलिसात तक्रार का केली नाही? दोन महिलांमुळे सगळ्या अल्पसंख्याक समाजाला मतदानापासून रोखण्याचा अधिकार ग्रामसभेला कोणी दिला? समानतेचा संदेश देणाऱ्या शाहू महाराजांच्या पदस्पर्शानं पावन झालेल्या कोल्हापूरात धर्मांधतेचं विष कोण पसरवतंय? असे सवाल साम टीव्हीने उपस्थित केले आहेत.

घडल्या प्रकारानं महाराष्ट्रातील ग्रामपंचायत या हरियाणातल्या खाप पंचायती बनत चालल्या की काय असा गंभीर प्रश्न निर्माण झालाय. थेट नागरिकांच्या मतदानाचा हक्क केवळ धर्मद्वेषामुळे हिरावून नेण्याचा डाव करणा-यांवर कारवाईची मागणी यानिमित्तानं होतेय.