कोल्हापूरमध्ये रक्षणकर्त्या पोलिसावर हल्ला झाल्याची धक्कादायक घटना घडली आहे. व्हिडिओ कॉन्फरन्स रुममधून बाहेर जाण्यास सांगितल्याच्या रागातून कळंबा कारागृहातील दोन पोलिसांवर कैद्यांनी हल्ला केला. काल सकाळी साडेअकराच्या सुमारास हा प्रकार घडला असून, याप्रकरणी मोकातील आरोपी इम्रान शमशुद्दीन शेख याच्यावर गुन्हा दाखल करण्यात आला.

मिळालेल्या माहितीनुसार, संभाजी बाबूराव कामले व विलास उत्तम पारसे, अशी जखमी पोलिसांची नावे आहेत. मोकातील आरोपी शेख हा वर्षभरापासून कळंबा कारागृहात आहे. आज त्याची व्हिडिओ कॉन्फरन्सद्वारे सुनावणी होणार होती. साडेअकराच्या सुमारास तो सुनावणीसाठी कॉन्फरन्स खोलीसमोर आला. यावेळी इतर काही जणांची सुनावणी सुरू असल्याने त्याला थोडा वेळ थांबण्यास सांगण्यात आले होते.

पोलिस कर्मचाऱ्यांनी त्याला थांबायला सांगितले याचा राग आल्याने शेखने पोलिस कर्मचाऱ्यांशी हुज्जत घालण्यास सुरुवात केली. ड्युटीवर असलेले संभाजी कामले व विलास पारसे हे त्याची समजूत घालण्याचा प्रयत्न करीत होते. पण, तो ऐकण्याच्या मनस्थितीत नव्हता. यातूनच त्याने कामले यांना मारहाण सुरू केली.

याप्रकरणी जुना राजवाडा पोलीस ठाण्यात इमरान शेख वर गुन्हा नोंद करण्यात आला आहे. दरम्यान पोलीस कर्मचाऱ्यांवर कैद्यांनी हल्ला करणं ही घटना नवीन नाही. परंतु रक्षणकर्त्यावर कैद्यांकडून होणारा हल्ला ही बाबा गंभीर आहे. सुदैवाने या हल्ल्यात कोणतीही जीवित हानी झालेली नाही.