मामाच्या गावी जाण्यासाठी सोलापूर बसस्थानकावर आलेल्या अवघ्या अडीच वर्षांच्या चिमुरडीला एका अनोळखी महिलेने फसवून पळवून नेल्याची धक्कादायक घटना समोर आली आहे. तिच्या कानातील सोन्याच्या रिंग आणि पायातील पैंजण काढून घेत, संबंधित महिलेनं तिला मोडनिंब येथे सुरू असलेल्या लग्नसमारंभात सोडून दिलं. सोशल मीडियावर पोस्ट व्हायरल झाल्यानंतर केवळ सहा तासांत चिमुकलीला तिच्या आई-वडिलांच्या स्वाधीन करण्यात आलं.

बावी येथील राजाभाऊ माळी यांच्या मुलीचं लग्न मोडनिंबमधील एका मंगल कार्यालयात सुरू होते. अक्षता कार्यक्रमात चिमुरडी जोरजोरात रडायला लागली. वऱ्हाडींचं लक्ष त्या चिमुरडीवर गेलं. तिला विचारले असता, ती फक्त "मी सोलापूरची आहे" एवढंच सांगत होती. या नंतर राजाभाऊ माळी यांनी तिचा फोटो आणि माहिती सोशल मीडियावर शेअर केली.

घटनेची माहिती मिळताच पोलिसांनी सोलापूर बसस्थानकातील सीसीटीव्ही फुटेजची तपासणी केली. फुटेजमध्ये एक महिला मुलीला घेऊन जाताना दिसली. पोलिसांनी वेळ न दवडता तपास सुरू करत केवळ सहा तासांत मुलीचा शोध घेतला आणि आई वडिलांच्या स्वाधीन केले.

मुलीला पळवून नेणारी महिला अद्याप फरार असून, पोलिसांकडून तिचा कसून शोध सुरू आहे. या घटनेनंतर बसस्थानक आणि गर्दीच्या ठिकाणी लहान मुलांबाबत अधिक सतर्क राहण्याचे आवाहन करण्यात येत आहे.