- अक्षय गवळी

अकोल्यात कुलरमध्ये पाणी भरताना विजेचा धक्का लागून एका 7 वर्षीय चिमुकलीला जिव गमवावा लागला आहे. घरात लावलेल्या कूलरजवळ खेळत असताना, या कूलरमधील विजेचा धक्का लागल्याने चिमुकलीचा जागेवरच मृत्यू झाला. युक्ती अमोल गोगे (yukti amol goge) असे मृत चिमुकलीचे नाव आहे. रविवारी रात्रीच्या सुमारास ही दुर्देवी घटना घडली. या प्रकरणी जुने शहर पोलिसांनी आकस्मित मृत्यूची नोंद केल्याची माहिती साम टीव्हीला दिली. दरम्यान कूलरचा शॉक लागून मृत्यु झाल्याची अकोल्यातील ही दूसरी घटना आहे. (Maharashtra News)

अकोला शहरातील माजी नगरसेवक अमोल गोगे यांची 7 वर्षीय मुलगी युक्ती ही घरात खेळत असताना कूलरजवळ गेली. कूलरमधील विजेचा धक्का लागल्याने या मुलीचा जागेवरच मृत्यू झाला.

युक्तीचे आईवडील व कुटुंबीय घरातच होते. मात्र, त्यांच्या लक्षात येईपर्यंत वेळ निघून गेली हाेती. युक्तीला विजेचा धक्का लागल्याची माहिती मिळताच कुटुंबीय व परिसरातील नागरिकांनी तिला तातडीने रुग्णालयात उपचारासाठी नेले असता, डॉक्टरांनी तिचा मृत्यू झाल्याचे सांगताच, गोगे कुटुंबीयांवर दुःखाचा डोंगर कोसळला.

दरम्यान कूलरला असलेल्या बटनांची एक वायर कटून त्यामधील करंट कूलरच्या जाळीला लागला. संपूर्ण कूलरमधून विजेचा प्रवाह सुरू असतानाच युक्तीचा हात कूलरला लागला होता त्यातून ही दुर्घटना घडली. काही दिवसांपूर्वीचं पाणी भरतांना भिंतीवरील वायरला स्पर्श झाल्यानं जोरदार विजेचा धक्का लागून पोलिस दलातील अंमलदार गणेश रामराव सोनोने (५७, रा. अंबिका नगर, मलकापूर) यांचा दुर्दैवी मृत्यू झाला होता.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar