कर्जतच्या नगराध्यक्ष उषा राऊत यांनी नुकतंच आपल्या पदाचा राजीनामा दिला आहे. त्यांनी हा राजीनामा जिल्हाधिकारी यांच्याकडे सोपवला आहे. उषा राऊतांवर नव्या कायद्यानुसार, दाखल केलेल्या अविश्वास प्रस्तावावर जिल्हाधिकार्‍यांनी आज अकरा वाजता विशेष सभा आयोजित केली होती. मात्र, त्याआधीच उषा राऊत यांनी आपला पदाचा राजीनामा दिला आहे. राजीनामा सोपवल्यामुळे या घटनेचे गांभीर्यच संपल्याचे बोलले जात आहे.

नगरसेवकांची फोडाफोडी

कर्जत नगरपंचायत आमदार रोहित पवार यांच्या ताब्यात आहे. त्यांना धक्का देण्यासाठी विधान परिषदेचे सभापती राम शिंदे यांनी राष्ट्रवादी काँग्रेसचे (शरद पवार गट) तब्बल आठ नगरसेवक फोडले होते. नव्या कायद्यासाठी शिंदे यांनीच पाठपुरावा केला आहे. त्यानुसार कर्जतच्या नगराध्यक्ष राऊत यांच्या विरोधात सत्ताधारी ११ नगरसेवकांसह भाजपाच्या २ अशा १३ नगरसेवकांनी अविश्वास प्रस्ताव दाखल केला आहे.

रोहित पवारांना मोठा धक्का

कर्जत नगरपंचायतमध्ये महाविकास आघाडीत देखील फूट पडली आहे. काँग्रेसचे तीन नगरसेवक देखील रोहित पवार यांच्या विरोधात गेले आहेत. आगामी निवडणुकीच्या पार्श्वभुमीवर रोहित पवार यांना हा मोठा धक्का मानला जात आहे.

माझ्यावर अन्याय झाला

'माझ्या कामात कुठेच काही दोष आढळून येत नसल्याने फक्त माझे पद घालवण्यासाठी थेट विधानपरिषदेचे सभापती राम शिंदेंनी पदाचा गैरवापर कायदा करत माझ्यावर अन्याय करण्याची भूमिका घेतली' असा आरोप नगराध्यक्ष उषा राऊत यांनी केला आहे.