अभिजीत देशमुख
कल्याण : महावितरणकडून अघोषित भारनियमन केले जात असल्यामुळे नागरिकांना नाहक त्रासाला सामोरे जावे लागत असते. अशाच प्रकारे महावितरणचा गलथान कारभार कल्याण पूर्वेत पाहण्यस मिळत असून वारंवार वीज पुरवठा खंडित होत असल्याने कल्याण पूर्वेत महिलां, विद्यार्थ्यांना त्रास सहन करावा लागत आहे. याबाबत अधिकाऱ्यांना विचारणा केली असता अधिकारी देखील उडवाडवीचे उत्तर देत असल्याचा आरोप नागरिकांनी केला आहे. 

कल्याण पूर्वेत वारंवार वीज पुरवठा खंडित होत असल्याने नागरिकांना त्याचा त्रास सहन करावा लागत आहे. या अघोषित लोडशेडिंगमुळे नागरिक त्रस्त झालेत. वारंवार विद्युत पुरवठा खंडित होत असल्याने परीक्षा काळात विद्यार्थ्यांना नाहक त्रास सहन करावा लागतो आहे. महावितरणच्या अधिकाऱ्यांना फोन करून देखील अधिकारी, कर्मचारी जुमानत नसल्याचा आरोप नागरिकांकडून केला जात आहे. 

कंदील भेट देत नोंदविला निषेध 

मागील काही दिवसांपासून सुरु असलेल्या या समस्येच्या प्रकरणी आज कल्याण पूर्व येथील माजी नगरसेवक महेश गायकवाड यांनी काही नागरिकांसोबत वीज वितरण कार्यालयाला धडक दिली. यावेळी वीज पुरवठा खंडित कोणत्या कारणामुळे होत आहे. याबाबत जाब विचारला. तसेच महावितरणचे कार्यकारी अभियंता चंद्रमणी मिश्रा यांना कंदील भेट देत महावितरणच्या गलथान कारभाराचा निषेध नोंदवला. 

तीव्र आंदोलनाचा दिला इशारा 

दरम्यान वीज पुरवठा सुरळीत करण्याची मागणी केली. तसेच रस्त्यांवरील वाहतूक कोंडी अडथळे ठरणारे पोल बदलून त्याऐवजी मोनो पोल बसवा अशी मागणी देखील करण्यात आली आहे. तर येत्या पंधरा दिवसात वीज पुरवठा खंडित होण्याची समस्या सुटली नाही तर तीव्र स्वरूपाचे आंदोलन करण्याचा इशारा महेश गायकवाड यांनी दिला आहे.