अभिजित देशमुख

कल्याण : नवी मुंबईहून कल्याणच्या दिशेने रात्रीच्या सुमारास  कॅबने प्रवास करणाऱ्या एका तरुणीचा (Kalyan) कॅब चालकाने विनयभंग केला. या प्रकरणी पीडितेच्या तक्रारीवरून कोळशेवाडी पोलिसांनी कॅबचालक राकेश जयस्वाल याला नवी मुंबई ऐरोली येथून ताब्यात घेतले आहे. (Latest Marathi News)

नवी मुंबई परिसरात एका कंपनीमध्ये काम करणारी तरुणी तीन दिवसांपूर्वी काम आटोपल्यानंतर रात्रीच्या सुमारास घराच्या दिशेने निघाली होती. कल्याण येथे येण्यासाठी तिने नवी मुंबई येथून कॅब बुक केली. या कॅबने प्रवास करत असताना कॅब चालकाने पीडित तरुणीचा विनयभंग केला. (Crime) पीडितेने आरडा ओरड करताच कॅब चालकाने कल्याण सूचक नाका परिसरात तरुणीला खाली उतरवून तेथून पळून गेला. 

कॅब चालकास अटक 

घटनेमुळे रात्री अपरात्री कॅबने प्रवास करणाऱ्या महिलांच्या सुरक्षिततेचा प्रश्न निर्माण झाला होता. पिडीतेने घडल्या प्रकाराबाबत कल्याण कोळशेवाडी पोलीस ठाण्यात तक्रार नोंदवली. या तक्रारीनुसार पोलिसांनी गुन्हा दाखल करत या कॅब चालकाचा शोध सुरू केला. अखेर पोलिसांनी नवी मुंबई ऐरोली येथून राकेश जयस्वाल या कॅब चालकाला अटक केली आहे.