अभिजित देशमुख 
कल्याण : कल्याण पूर्व- पश्चिम जोडणाऱ्या स्कायवॉकवर दोन चोरट्यांनी दगडाने हल्ला करत एका इसमाचा मोबाईल आणि रोकड लुबाडल्याची घटना समोर आली आहे. सुरेश सिंह असे या जखमी झालेल्या इसमाचे नाव असून तो भाजीविक्रेता आहे. या प्रकरणी कोळशेवाडी पोलीस ठाण्यात गुन्हा दाखल करण्यात आला असून सीसीटीव्ही फुटेजच्या आधारे पोलीस चोरट्यांचा शोध घेण्यात येत आहे.

रेल्वे स्टेशन परिसर आता चोरट्यांचा अड्डा बनला आहे. रात्रीच्या वेळी एकटा व्यक्ती असल्याचे साधून त्याला लुबाडण्यात येत असल्याच्या घटना अनेकदा समोर आल्या आहेत. यातच कल्याण रेल्वे स्कायवॉकवर रात्रीच्या सुमारास भाजी विक्रेत्यास लुबाडण्याची घटना घडली आहे. सुरेश समर बहादूर सिंह असे लुबाडणूक करण्यात आलेल्या भाजी विक्रेत्याचे नाव आहे. भाजी विक्रीचा व्यवसाय  करून ते कुटुंबाचा उदरनिर्वाह करत असतात. 

भाजीपाला आणण्यासाठी जात असताना अडविले  

दरम्यान भाजी विक्रीसाठी सुरेश सिह हे काल पहाटे भाजीपाला घेण्यासाठी कल्याण पूर्व येथून स्कायवॉकवरून कल्याण रेल्वे स्टेशनच्या दिशेने जात होते. याच दरम्यान दोन चोरट्यानी त्यांना अडविले. यानंतर सुरेश याना दगडाने मारहाण करत त्यांच्याजवळील मोबाईल आणि रोख सहा हजार रुपये लुबाडून पसार झाले. या हल्ल्यात सुरेश सिंह गंभीर जखमी झाले असून त्याच्यावर खाजगी रुग्णालयात उपचार सुरू आहेत.

पोलिसात गुन्हा दाखल 

सदर घटना घडल्यानंतर सुरेश यांनी याप्रकरणी कल्याण कोळसवाडी पोलीस ठाण्यात तक्रार दाखल केली. या तक्रारीवरून गुन्हा दाखल करण्यात आला असून पोलिसांनी आरोपीचा शोध सुरू केला आहे. या स्कायवॉकवरून दररोज हजारो प्रवासी ये- जा करत असतात. या घटनेमुळे प्रवाशांमध्ये भीतीचे वातावरण पसरले आहे.