अभिजित देशमुख
कल्याण : कल्याण शीळ रोडवर असलेल्या भंगार मालाच्या दुकानात मोलमजुरी करणाऱ्या मजुरांच्या मोबाईल फोनसह वाहनांच्या बॅटऱ्या चोरी करण्यात आली होती. चोरी करणाऱ्या या दोन सराईत चोरट्यांना क्राईम ब्रँचच्या कल्याण युनिटने बेड्या ठोकल्या आहेत.  चोरट्यांकडून चोरीचा सर्व मुद्देमाल हस्तगत करण्यात आला आहे.

कल्याण (Kalyan) शीळ रोडवर भंगार दुकानातून दोघं चोरट्यानी या दुकानात काम करणाऱ्या कामगारांचे साहित्य चोरून नेले होते. याची माहिती पोलिसांना (Police) देण्यात आली होती. त्यानुसार पोलिसांनी तपास सुरु केला होता. दरम्यान चोरीचे मोबाईल आणि वाहनांच्या बॅटऱ्या विकण्यासाठी कल्याण- शिळ महामार्गावर असलेल्या कोळेगावाजवळ दोघेजण येणार असल्याची माहिती क्राईम ब्रांचला मिळाली. या माहितीच्या आधारे क्राईम ब्रांचच्या पथकाने सापळा रचत दोघांना बेड्या ठोकल्या. अनुराग मंडराई व इरफान शेख या दोघांना ताब्यात घेतलेल्या चोरट्याची नावे आहेत. 

दोघांवर यापूर्वीही घरफोडीचे गुन्हे 

हे दोघेही रेकॉर्डवरील गुन्हेगार आहेत. यातील इरफान शेख याच्यावर मानपाडा, रामनगर आणि टिळकनगर पोलिस ठाण्यात घरफोड्यांचे तब्बल १२ गुन्हे दाखल आहेत. तर अनुराग मंडराई याच्यावर देखील मानपाडा, रामनगर आणि टिळकनगर पोलिस ठाण्यात घरफोड्यांचे ५ गुन्हे दाखल असल्याची माहिती पोलिसांनी दिली.