अक्षय शिंदे 
जालना : जिल्हा परिषदेच्या शाळेत जादूटोणा केल्याचे कृत्य धक्कादायक समोर आले आहे. जालन्यातील गोंदी येथील जिल्हा परिषदेच्या शाळेमध्ये बांगड्या, हळद- कुंक आणि बाहुली आढळून आली आहे. हा प्रकार शनिवारी घडला असून या घटनेमुळे खळबळ उडाली असून विद्यार्थ्यांनी वर्गातून बाहेर पाल काढला होता. 

जिल्हा परिषद शाळांची अवस्था बिकट असल्याचे चित्र सर्वत्र पाहण्यास मिळते. शाळांमधील वर्गाना खिडकी, दरवाजे नसल्याचे चित्र ग्रामीण भागात आहे. यामुळे शाळेच्या आवारात कोणीही प्रवेश करत असतो. यातून जालना जिल्ह्यातील गोंदी येथील शाळेत जादूटोण्यासारखा प्रकार कोणीतरी केल्याचे समोर आले आहे. या घटनेमुळं गावात एकच चर्चा रंगत असून विद्यार्थ्यांमध्ये घबराट पसरली आहे. 

जालना जिल्ह्यातील गोंदी येथील जिल्हा परिषद शाळेतील वर्गात हा प्रकार शनिवारच्या दिवशी समोर आला आहे. एका वर्गात बांगड्या, वाहिलेले हळद कुंकू आणि बाहुली आढळून आली आहे. हा धक्कादायक प्रकार पाहून नववीच्या वर्गातील विद्यार्थ्यांनी वर्गातून पळ काढला. तर या प्रकारामुळे विद्यार्थ्यांमध्ये भीतीचे वातावरण निर्माण झाले आहे.

सीसीटीव्हीही गेले चोरीला 

दरम्यान गोंदी येथील जिल्हा परिषद शाळेतील सीसीटीव्ही कॅमेरे देखील काही दिवसापूर्वीच चोरी गेल्याची माहिती समोर आली आहे. याप्रकरणी शालेय व्यवस्थापन समिती आणि मुख्याध्यापकांनी जालन्यातील गोंदी पोलिसांना निवेदन दिले आहे. मात्र या प्रकरणी अद्याप गुन्हा दाखल झालेला नाही. यातच शाळेच्या वर्ग खोलीत जादूटोण्यासारखा प्रकार समोर आला आहे. जादूटोण्यासारखे कृत्य केल्याची घटना समोर आली आहे.