अक्षय शिंदे-पाटील, साम टीव्ही, प्रतिनिधी

जालना शहरात घरगुती स्फोट झाल्याची धक्कादायक घटना घडली आहे. जालन्यामधील कालीकुर्ती परिसरातील तरलेचा नगर येथे ही घटना घडली आहे. गॅस लिकेज झाल्यामुळे गॅसचा स्फोट झाल्याचा प्राथमिक अंदाज वर्तवला जात आहे. कुटुंबातील तिघेजण जखमी झाले आहेत, तसेच घरातील पाळीव कुत्र्याचा जागीच मृत्यू झाल्याची माहिती समोर आली आहे.

मिळालेल्या माहितीनुसार, जालन्याच्या बडीसडक परिसरातील कालीकुर्ती भागातील तरलेच्या नगरमध्ये घरगुती गॅसचा स्फोट झाला. या स्फोटामुळे घरातील अनेक गृहउपयोगी वस्तू जळून खाक झाल्या. तसेच कुटुंबातील तीन जण गंभीररित्या जखमी झाले.

घरगुती स्फोटामध्ये जखमी झालेल्या कुटुंबियांवर जालना शहरातील एका खासगी रुग्णालयात उपचार सुरु करण्यात आले आहेत. या स्फोटामध्ये घरातील ५०० आणि १०० रुपयांच्या नोटा देखील जळाल्या आहेत. स्फोटामध्ये गृहउपयोगी वस्तू आणि पैसे जळाल्याने आम्हाला नुकसान भरपाई द्यावी अशी मागणी कुटुंबियांनी केली आहे.

जालना शहरात एका घरात गॅसचा स्फोट झाला. या स्फोटामध्ये घरातील पाळीव कुत्र्याचा मृत्यू झाला. अनेक वस्तू जळाल्या, त्यासह ५०० आणि १००० रुपयांच्या अनेक नोट्या जळाल्या. तसेच कुटुंबातील तिघांना स्फोटामुळे गंभीर जखमा झाल्या. जखमींना एका खासगी रुग्णालयात दाखल करण्यात आल्याची माहिती समोर आली आहे.