लक्षमण सोळुंके

Jalna News: स्वातंत्र्य दिनी जालना येथे एका व्यक्तीने दारू बंदीच्या मुद्द्यावरुन आत्मदहन करण्याचा प्रयत्न केला आहे. यामध्ये हा व्यक्ती ५० टक्के भाजलाय. सध्या त्याच्यावर जवळच्या रुग्णालयात उपचार सुरू आहेत. दारूबंदीसाठी त्याने टोकाचं पाऊल उचलल्याने गावकऱ्यांमध्ये खळबळ उडालीये. (Latest Marathi News)

याबाबत अधिक माहिती अशी की, घनसावंगी तालुक्यातील पिंपरखेडा गावात अवैधरीत्या दारू विक्री सुरू आहे. ती बंद करावी म्हणून वारंवार ग्रामपंचायत आणि दारूबंदी विभागाला तक्रार केली जात होती. मात्र कुठलीच कारवाई होत नसल्याने १५ ऑगस्ट रोजी ग्रामपंचायत कार्यालयासमोर आत्मदहनाचा इशारा या व्यक्तीने दिला होता.

वसंत प्रभाकर नागारे असं आत्मदहनाचा प्रयत्न करणाऱ्या व्यक्तीचं नाव आहे. वसंत यांनी आज ध्वजारोहाणानंतर ग्रामपंचायत कार्यालयासमोर अंगावर रॉकेल ओतले आणि स्वतःला पेटून घेत आत्मदहनाचा प्रयत्न केला. यात वसंत नागरी हे 50% जळाले असून त्यांना उपचारासाठी पोलिसांनी तात्काळ रुग्णालयात दाखल केलं आहे.

याप्रकरणी पोलिसांनी तीर्थपुरी पोलीस ठाण्यात घटनेची नोंद केली आहे. या प्रकरणी पोलिस अधिक तपास करत आहेत. वारंवार सरपंच आणि दारूबंदी विभाग विभागाला तक्रार करूनही कुठलीच कारवाई केली जात नसल्यामुळे आपण दारूबंदीसाठी आत्मदहन करण्याचा प्रयत्न केला असल्याचं प्रभाकर नागरे यांनी म्हटलंय. दारूबंदी विभागाविरोधात केलेल्या या आत्मदहनाच्या प्रयत्नामुळे जिल्ह्यात एकच खलबळ उडाली आहे.