यावल (जळगाव) : किरकोळ कारणातून वाद निर्माण होऊन एका युवकाची दोघांनी मिळून हत्या केल्याची घटना यावल तालुक्यातील विरावली– दहिगाव रस्त्यावरील खिरवड नाल्याजवळ घडली आहे. दरम्यान या घटनेनंतर दोघे मारेकरी स्वतःहून पोलीस स्टेशनमध्ये जाऊन हजर होत त्यांनी हत्या केल्याची कबुली दिली आहे. यानंतर पोलिसांनी दोघांना ताब्यात घेत तपास सुरु केला आहे. 

यावल तालुक्यातील दहीगाव येथील इम्रान युनूस पटेल (वय १९) असे हत्या करण्यात आलेल्या तरुणाचे नाव आहे. सदरची घटना शुक्रवारी (२९ ऑगस्ट) रात्रीच्या सुमारास घडली आहे. इम्रान पटेल हा मूळचा धरणगाव तालुक्यातील हनुमंतखेडे येथील रहिवासी आहे. मात्र त्याचे आजोबा इसा हिराजी पटेल हे वृद्ध असल्याने त्यांची देखभाल करण्यासाठी तो मागील दोन वर्षांपासून दहिगाव येथील सुरेशआबा नगरात राहत होता.

वाद झाल्याने शस्त्राने वार 

दरम्यान २९ ऑगस्टला रात्री ज्ञानेश्‍वर गजानन पाटील (वय १९) व गजानन रवींद्र कोळी (वय १९) यांनी इम्रान यास रात्रीच्या सुमारास गाठले. यावेळी त्यांच्यात वाद झाला असता दोघा संशयितांनी इम्रान याच्यावर धारदार शस्त्राने वार करत त्याचा खून केला. यानंतर दोघेजण स्वतःहून यावल पोलीस स्टेशनमध्ये जमा होत. इम्रान याची हत्या केल्याची माहिती पोलिसांना दिली. यानंतर पोलीस घटनास्थळी दाखल झाले.

खुनाचा गुन्हा दाखल 
युनूस इसा पटेल यांनी दिलेल्या फिर्यादीवरून संशयित ज्ञानेश्वर गजानन पाटील (१९) व गजानन रवींद्र कोळी (१९) या दोघांविरुद्ध खुनाचा गुन्हा दाखल करण्यात आला असून त्यांना अटक करण्यात आली आहे. दरम्यान दहिगाव येथील इम्रान पटेल या युवकाच्या हत्या प्रकरणी संशयितांना येथील न्यायालयात उपस्थित केले असता संशयित आरोपींना चार सप्टेंबरपर्यंत पोलिस कोठडीत ठेवण्याचा आदेश दिला आहे.