जळगावमधील परधाडे रेल्वे स्थानकाजवळ मोठी दुर्घटना घडली. पुष्पक एक्स्प्रेसच्या डब्यातून धूर निघाल्यानंतर आगीच्या भीतीनं अनेक प्रवाशांनी रेल्वे ट्रॅकवर उड्या मारल्या. त्याचवेळी दुसऱ्या दिशेकडून येणाऱ्या एक्स्प्रेसनं त्या प्रवाशांना उडवलं. यात अनेक प्रवाशांचा मृत्यू झाल्याची शक्यता व्यक्त केली जात आहे. प्राथमिक माहितीनुसार या अपघातामध्ये ५ ते ६ प्रवाशांचा मृत्यू झाला. मृत्यूचा आकडा आठपर्यंत पोहोचल्याचे सांगण्यात येत आहे.

जळगावमधील परधाडे रेल्वे स्थानकाजवळ हा भयंकर अपघात घडल्याची माहिती आहे. पुष्पक एक्स्प्रेसमधून अचानक धूर निघू लागला. एक्स्प्रेसमध्ये आग लागल्याची भीती प्रवाशांमध्ये पसरली. त्यातील काही प्रवाशांनी रेल्वे ट्रॅकवर उड्या मारल्या. त्याचवेळी विरुद्ध दिशेच्या रुळांवरून बेंगळुरू एक्स्प्रेस येत होती. या एक्स्प्रेसनं रेल्वे ट्रॅकवर उतरलेल्या काही प्रवाशांना उडवलं. यात अनेकांचा मृत्यू झाल्याची शक्यता व्यक्त करण्यात येत आहे.

मिळालेल्या माहितीनुसार, पुष्पक एक्स्प्रेस अचानक थांबली. त्यामुळं ठिणग्या उडाल्या आणि धूर निघू लागला. एक्स्प्रेसमध्ये आग लागल्याचा समज काही प्रवाशांचा झाला. त्यातील अनेकांनी भीतीपोटी रेल्वे ट्रॅकवर उड्या मारल्या. त्याचवेळी दुसऱ्या ट्रॅकवरून बेंगळुरू एक्स्प्रेस जात होती. या एक्स्प्रेसने काही प्रवाशांना उडवलं. यात अनेकांचा मृत्यू झाल्याची शक्यता आहे. या घटनेची माहिती मिळताच, पोलीस आणि रेल्वे कर्मचारी घटनास्थळी पोहोचले आहेत.

नेमकं काय घडलं?

जळगावच्या परधाडे गावाजवळ हा अपघात घडला. पुष्पक एक्स्प्रेस ही लखनऊकडून मुंबईकडे येत होती. एक्स्प्रेस ब्रेक दाबल्याने ठिणग्या उडाल्या. आग लागल्याच्या भीतीनं पुष्पक एक्स्प्रेसमधून ३५ ते ४० प्रवाशांनी रेल्वे ट्रॅकवर उड्या मारल्या. त्याचवेळी बाजूच्या रुळांवरून येणाऱ्या बेंगळुरू एक्स्प्रेसने काही प्रवाशांना उडवलं. यात अनेकांचा बळी गेल्याची शक्यता व्यक्त केली जात आहे. सहा ते सात जणांना रुग्णालयात दाखल केल्याची माहिती समजते.