संजय महाजन, जळगाव

जळगाव जिल्ह्यातील चाळीसगाव तालुक्यात असलेल्या कन्नड घाटात भीषण अपघात झाला आहे. उज्जैन येथे देवदर्शनासाठी जाणाऱ्या तिघांवर काळाने घाला घातला आहे. गाडीवरील नियंत्रण सुटल्याने हा अपघात झाला असून चौघे गंभीर जखमी झाले आहेत. दरम्यान पोलीस या घटनेचा तपास करत असून जखमींवर तातडीने उपचार सुरु करण्यात आले आहेत.

मिळालेल्या माहितीनुसार, उज्जैन येथे दर्शनासाठी एका मित्रांचा ७ जणांचा ग्रुप जात होता. देवदर्शनासाठी निघालेल्या या तरुणांच्या आनंदावर विरझन पडले. चारचाकीने निघालेल्या या तरुणांवर जळगाव जिल्ह्यातील चाळीसगाव तालुक्यात असलेल्या कन्नड घाटातील वळणावर चालकाचे नियंत्रण सुटले. गाडीवरील नियंत्रण सुटल्याने गाडीचा भीषण अपघात झाला.

या अपघातात नगर जिल्ह्यातील शेवगाव येथील तिघांचा मृत्यू झाला. तर इतर चौघे गंभीर जखमी झाले आहेत. अपघात इतका भीषण होता की वाहनाचे मोठ्या प्रमाणावर नुकसान झाले आहे. कारच्या पुढच्या भागाचा चक्काचूर झाला आहे. या अपघातातील जखमींना सध्या जवळच्या रुग्णालयात उपचारांसाठी दाखल करण्यात आले आहे.

या भीषण अपघातानंतर पोलिसांनी घटनास्थळ गाठून घटनेचा पंचनामा केला आहे. मृत तरुणांचा मृतदेह ताब्यात घेऊन शवविच्छेदनासाठी पाठवण्यात आला आहे. या अपघातादरम्यान चालक मद्यधुंद होता का? हा अपघात कसा झाला यासंदर्भात पोलीस पुढील तपास करत आहेत.