संजय महाजन, जळगाव

जळगावच्या चोपडा तालुक्यातील मामलदे येथे अत्यंत धक्कादायक घटना समोर आली आहे. दोन महिन्यांच्या मुलीला हिंस्त्र प्राण्याने शिकार केल्याची घटना घडली असून, या घटनेमुळे परिसरात भीतीचे वातावरण पसरले आहे. वन विभागाच्या कारभारावर नागरिकांनी तीव्र नाराजी व्यक्त केली आहे.

मिळालेल्या माहितीनुसार, जळगावच्या मामलदे गावाजवळील शेतात एक कुटुंब वास्तव्यास आहे. या कुटुंबातील दोन महिन्यांपूर्वी एका चिमुकलीचा जन्म झाला. मुलीच्या जन्मानंतर संपूर्ण कुटुंब आनंदात होत. मात्र २ महिन्यांनंतर या आनंदी कुटुंबावर दुःखाचा डोंगर कोसळला आहे.

२ महिन्यांची मुलीला आईच्या कुशीत झोपलेली असताना रात्रीच्या वेळी एका अज्ञात हिंस्त्र प्राण्याने तिला उचलून नेल्याची घटना घडली. सकाळी मुलगी आईच्या कुशीत आणि इतरत्र घरात कुठेही दिसून न आल्याने कुटुंबीयांनी तिचा शोध घेतला. खूप शोधल्यानंतर शेताजवळ काही अंतरावर मुलीचे अवशेष आढळून आले.मात्र कोणत्या प्राण्याने तिच्यावर हल्ला केला हे अद्याप समोर आलेलं नाही. याप्रकरणी तपास सुरु आहे.

या घटनेनंतर परिसरात भीतीचे वातावरण निर्माण झाले असून, नागरिकांमध्ये संताप व्यक्त होत आहे. वारंवार बिबट्याच्या हल्ल्यांच्या घटना घडत असतानाही वन विभागाने योग्य उपाययोजना न केल्याचा आरोप नागरिकांनी केला आहे. दरम्यान, या घटनेमुळे चोपडा तालुक्यात भीतीचे वातावरण असून, वन विभागाने तातडीने उपाययोजना कराव्यात, अशी मागणी स्थानिकांकडून करण्यात येत आहे.