जळगाव : आम्ही एकनाथ शिंदे यांच्यासोबत गेलो, तेव्हा आम्हाला गद्दार म्हणणाऱ्यांना अजित पवार यांनी सोबत घेतले. आमची इच्छा नसतानाही त्या सर्वांना पक्षात घेतलं. या निर्णयाचा अजित पवार यांना पश्चाताप झाल्याशिवाय राहणार नाही; अशा शब्दात मंत्री गुलाबराव पाटील यांनी अजित पवार यांच्यावर निशाणा साधला आहे. 

शिवसेना शिंदे गटाचे जळगावातील नेते व पालकमंत्री गुलाबराव पाटील यांचे कट्टर राजकीय विरोधक असलेल्या गुलाबराव देवकर यांना अजित पवार यांनी पक्षात घेतले आहे. त्यामुळे पाटील यांनी देवकर यांच्यासह थेट अजित पवार यांच्यावरही हल्लाबोल केला आहे. यामुळे आगामी काळात जळगाव जिल्ह्यातील राजकीय वातावरण बदलणार कि तापणार हे पाहणे महत्त्वाचे राहणार आहे. 

एकनाथ शिंदे यांच्यासोबत चर्चा करायला हवी होती 
अजित पवार यांनी देवकर यांना पक्षात घेण्याआधी एकनाथ शिंदे यांच्यासोबत एकदा चर्चा करायला हवी होती. खरंच महायुतीचे हे धोरण आहे का? देवकर यांच्या जेव्हा शंभर गोष्टी बाहेर येतील, तेव्हा अजित पवारही म्हणतील की गुलाबराव पाटील खरं म्हणत होते. भ्रष्टाचारावर पांघरुन घालण्यासाठी देवकर अजित पवारांच्या पक्षात गेले आहेत. पण गुलाबराव पाटील ही घाण साफ होऊ देणार नाही. खरं काय ते लोकांसमोर आणल्याशिवाय राहणार नाही; असा इशारा गुलाबराव पाटील यांनी दिला.

आता तुम्ही ओके झाले का?
गुलाबराव पाटील म्हणाले, कि अजित पवार यांच्यावर देवकर यांनी कायम टीका केल्या आहेत. अजित दादांना ज्यांनी काळे झेंडे दाखविले. त्याच देवकरांना अजितदादांनी त्यांच्या पक्षात घेतलं आहे. हेच गुलाबराव देवकर आम्ही एकनाथ शिंदे यांच्यासोबत आलो; तेव्हा आम्हाला गद्दार म्हणत होते, खोके म्हणत होते. मग ते अजित पवार यांच्या पक्षात येऊन आता ओके झाले काय? असा सवाल गुलाबराव पाटील यांनी उपस्थित केला.