जळगाव : नववर्ष स्वागतासाठी पार्ट्या आयोजित करत त्यात मद्य देखील प्राशन केले जात असते. मद्य प्राशन करणाऱ्यांवर कारवाई केली जात असते. मात्र हि कारवाई टाळण्यासाठी अधिकृत परवाना काढून घेतला जात असतो. अशा प्रकारे जळगाव जिल्ह्यात राज्य उत्पादन शुल्क विभागाच्या वतीने ३१ फर्स्टच्या पार्श्वभूमीवर एक लाख नागरिकांना एक दिवसीय मद्य प्राशन करण्याचे परवाने वितरीत करण्यात आले आहे. 

थर्टी फर्स्ट अर्थात सरत्या वर्षाला निरोप देत नववर्षाचे स्वागत करण्याच्या अनुषंगाने हॉटेल, ढाबे अशा ठिकाणी पार्ट्यांचे बुकिंग करण्यात आले आहे. तर काहीजण घरी किंवा शेतात जाऊन पार्टी करत सेलिब्रेशन करत असतात. दरम्यान पार्टी करण्यासोबत अनेकजण अवैधपणे मद्य प्राशन करत गोंधळ देखील घालत असतात. अशांवर पोलिसांची नजर राहत असते. मात्र थर्टी फर्स्टला दारू पिण्यासाठी अधिकृत परवानगी घेण्यात आली असून एका दिवसासाठी परवानगी देण्यात आल्याचे राज्य उत्पादन शुल्क विभागाचे अधीक्षक विठ्ठल भुकन यांनी सांगितले. 

जिल्ह्यात ५९५ बिअर बार 

जळगाव जिल्ह्यामध्ये एकूण ५९५ परमिट रूम बियर बार आहेत. तर ३४ वाईन शॉप व १४६ बिअर शॉपी आहेत. याठिकाणी पिणाऱ्यांची गर्दी असते. मात्र अवैध मद्य विक्रीवर उत्पादन शुल्क विभागाच्या पथकांची नजर करडी नजर राहणार असल्याचे अधीक्षक भूकन यांनी सांगितले. तसेच अवैध मद्य विक्री व बनावट दारू रोखण्यासाठी पथक नियुक्त करण्यात आले असून त्या माध्यमातून कारवाई केली जाणार असल्याचे देखील त्यांनी सांगितले. 

थर्टी फर्स्टनिमित्ताने पथक तैनात 
शासनाच्या आदेशानुसार मद्य विक्रीची वेळ ठरवून दिली असून त्याबाबत सूचना देण्यात आल्या आहेत. त्याचे पालन न करणाऱ्यांवर कारवाई केली जाणार आहे. तर नागरिकांनी सार्वजनिक ठिकाणी अवैधरित्या ढाब्यांवर मद्य प्राशन न करता परमिट रूम, बियर बार या ठिकाणी मद्यप्राशन करण्याचे आवाहन अधीक्षकांनी केले आहे. थर्टी फर्स्टच्या पार्श्वभूमीवर राज्य उत्पादन शुल्क विभाग सज्ज असून कारवाईसाठी जिल्ह्यात कर्मचारी तसेच पथक नियुक्त करण्यात आले आहेत.